Ekzekutori portugez i Ardian Nikulajt, i cili i mori jetën me 7 plumba të pistoletës “TT” biznesmenit në ambientet e lokalit të tij “Coral” më 19 prill, ka qëndruar më shumë se dy muaj në Shqipëri.
Ruben Sariva ka hyrë në territorin e vendit tonë më 11 shkurt 2023 dhe nuk është larguar deri në mbrëmjen e 19 prillit 2023, ku është kapur nga kamerat e sigurisë në pikën kufitare të Kapshticës në orën 21:25 duke kaluar kontrollin me pasaportë në dorë dhe me këmbë ka hyrë në brendesi të kufirit grek.
Ai dyshohet se me një mjet tjetër është larguar fillimisht drejt Selanikut dhe me linjën ajrore greke “Aegean Airlines” ka fluturuar drejt ishullit të Rodosit që ndodhet shumë afër me Turqinë.
Gjithçka ka qenë e përgatitur më së miri për të kryer vrasjen e bujshme në Shëngjin, aq sa policia ka zbulua se Edmon Haxhia i ka siguruar “killerit” nga Portugalia një “bazë të sigurt” për të qëndruar gjatë dy muajve në fshatin Kakarriq, midis Lezhës dhe Shkodrës.
Për ta bërë sa më të besueshëm qëndrimin e tij për një kohë të gjatë në zonë, pasi i duhej të vëzhgonte lëvizjet e Nikulajt, për Sarivën ishte krijuar një legjendë urbane.
Për të justifikuar faktin pse ndodhej në Shqipëri, madje në një fshat si Kakarriqi, ai kishte ngritur alibinë kishte rënë në dashuri me një vajzë nga Shkodra, por familjarët e saj nuk e pranonin lidhjen e tyre pasi ai ishte “mulat”.
Historinë e sajuar në mënyrë që banorët e zonës të mos dyshonin tek ai, e ka zbuluar gazetari Blendi Fevizu teksa fliste në një emision televiziv.
Saraiva tregonte se kishte dëshirë të martohej me një vajzë shqiptare, por që familja e saj nuk pranonte, ndaj kishte ardhur që t’i bindtte.
“Katër britanik dhe 1 portugez, që përfshihen në një vrasje në Shqipëri. Që rrinë dy muaj këtu, vijnë vërdallë. Madje sipas të dhënave që mora unë para emisionit, portugezi kishte hapur edhe një legjendë në zonën ku jetonte. Sikur donte një vajzë shqiptare dhe nuk ia jepte familja, edhe kishte ardhur për një histori dashurie. Në këtë mënyrë e dinte edhe ai që kemi disa probleme paragjykimiesh. Kështu që kishte krijuar një histori të tërën për alibi,”- tha Fevziu.
