“Arena e Demave” do të quhet stadiumi i Partizanit. Është klubi i kuq që përmes një njoftimi në kanalin zyrtar ka bërë me dije axhendën e ndeshjeve të 14-vjeçarëve ndaj Skënderbeut që do të luhet sot. Pikërisht në këtë njoftim, bie në sy emri i stadiumit të kryeqytetasve.
Ishte përfolur prej ditësh, por vetëm sot është bërë zyrtar. Ky stadium i ri është shndërruar në shtëpinë e Partizanit për ndeshjet pritëse, veç derbit që është spostuar në “Air Albania” prej kapacitetit që ofron impianti modern.
Kujtojmë që në këtë sezon futbollistik, 16 herë kampionët e vendit inauguruan stadiumin e ri, ndërsa tashmë pritet që e njëjta gjë të ndodhë me fushat stërvitore dhe hotelin që gjenden në krah të tij.
