6 persona morën pjesë në ekzekutimin e biznesmenit Ardjan Nikulaj, një javë më parë në Shëngjin. Bëhet fjalë për një shtetas shqiptaro-britanik,1 portugez dhe 4 britanikë. Në mesin e tyre është edhe një vajzë.
Ata janë:
1-E. H., shtetas me shtetësi shqiptare dhe britanike,
2-R. R. S., shtetas portugez,
3-H. J. S., shtetas britanik,
4-H. B., shtetase britanike,
5-TH. M., shtetas britanik,
6-S. P. H, shtetas britanik”.
Kreu i Policisë së Shtetit, Muhamet Rrumbullaku, në një konferencë për shtyp tha këtë të martë se në rolin e ekzekutorit ka qenë shtetasi portugez.
“Jemi 100 % të bindur në lidhje me përcaktimi e ekzekutorit i cili është shtetas portugez. Në lidhje me sigurimin e provave ju garantoj se kemi siguruar prova të plota që definojnë plotësisht autorësinë, rolet e personave të dyshuar.”
Të gjithë autorët e dyshuar, sipas kreut të policisë, pas ngjarjes kanë arritur të largohen nga Shqipëria.
“Grupi hetimor po bashkëpunon me partnerët dhe strukturat ligjzbatuese ndërkombëtare, për kapjen e autorëve të kësaj ngjarjeje të rëndë kriminale, të cilët janë larguar nga territori i Republikës së Shqipërisë, pas kryerjes së krimit.”
Sa i përket motiveve, Rrumbullaku tha se bëhet fjalë për gjakmarrje.
“Mbi bazën e materialeve të referuara nga shërbimet e Policisë Gjyqësore të Drejtorisë Vendore të Policisë Lezhë, Prokuroria pranë Gjykatës së Shkallës së Parë Lezhë ka regjistruar procedimin penal nr. 205, viti 2023 për veprën penale “Vrasja me paramendim”, kryer në formën e grupit të strukturuar kriminal, “Kryerja e veprave penale nga organizata kriminale dhe grupi i strukturuar kriminal” dhe “Mbajtja pa leje dhe prodhimi i armëve, armëve shpërthyese dhe municionit luftarak”.”
Po ashtu, ai u shpreh se policia ka mundur që të sigurojë prova të pakundërshtueshme për përfshirjen e këtyre personave në organizimin dhe vrasjen e biznesmenit 51-vjeçar.
