Dy triumfet e Etleda Çiftes në GJKKO dhe Apelin e Gjykatës së Posaçme që rrëzuan akuzat e ngritura nga SPAK për “falsifikim” dhe “deklarimi të rremë të pasurisë”, nuk e kanë penguar Prokurorinë e Posaçme që të heqë dorë nga çështja, duke kërkuar rekurs të vendimit në Gjykatën e Lartë.
Për kërkesën e SPAK është hedhur edhe shorti përkatës, me gjyqtarin Sandër Simoni të përcaktuar si relator i çështjes së anëtares së KPK-së.
Komisionerja e vetingut, e cila nuk e ndërpreu asnjë ditë detyrën e saj megjithëse ishte e pandehur, u shpall e pafajshme edhe pse organi i akuzës kërkoi dënimin e saj me 1 vit e 6 muaj burgim.
Me uljen e 1/3 së dënimit, Çiftja në rast të një vendimi ndryshe nga drejtësia do të dënohej me masë përfundimtare 1 vit burgim, duke e konvertuar këtë dënim në vendosjen e saj në shërbim prove për dy vjet.
Sipas prokurorisë, ka rezultuar e provuar tej dyshimit të arsyeshëm se e pandehura Etleda Çiftja, në deklaratën vitit 2017 ka kryer deklarim të rremë të pasurisë.
Çiftja akuzohej se ka mashtruar me deklarimin e burimit të blerjes së apartamentit të banimit, të dy parcelave tokë arë (me sipërfaqe 1450 m2 dhe me sipërfaqe 3440 m2), mënyrën e fitimit të pronësisë së dy pasurive të fundit, si dhe në lidhje me qëllimin e marrjes së një kredie.
LEXO EDHE:
Mandati i Vetingut/ Etleda Çiftja, dyshime për pasurinë dhe mashtrim në kredi (dokumentat)
Skandali me pasurinë e vetingases Etleda Çiftja zbulon llumin në “Drejtësinë e Re”
