Kryetari i PD-së, Sali Berisha, duke iu referuar çështjes “McGonigal” në SHBA, tha sot se një dosje penale është e hapur për kryeministrin Edi Rama, nga e cila nuk do shpëtojë dot nga burgu.
Deklaratën e bëri në një emision televiziv, ku foli dhe për gjyqin që ka çelur ndaj shpalljes “non grata” nga SHBA.
Berisha theksoi se vendimi i DASH për të shpallur atë non grata ishte me porosi dhe se gjyqit për këtë çështje do i shkojë deri në fund.
“Sali Berisha ka bërë një deklaratë për vendimin e DASH. Në momentin që do dorëzohet një dokument që fakton korrupsionin iki nga politika përgjithmonë. Unë sekretarin e shtetit e kam hedhur në gjyq dhe do i shkojë deri në fund kësaj çështje”, tha ai.
