Pas konfirmimit në detyrë në mars të këtij viti, Operacioni Ndërkombëtar i Monitorimit i ka rekomanduar sot Komisionerit Publikë, ankimimin në Kolegjin e Posaçëm të Apelimit, për gjyqtarin e Vlorës Plaurent Fuçia.
“Komisionerët Publikë morën sot rekomandim nga ONM për të ankimuar në Kolegjin e Posaçëm të Apelimit vendimin e konfirmimit në detyrë të subjektit të rivlerësimit, z. Laurent Fuçia, gjyqtar pranë Gjykatës së Rrethit Gjyqësor Vlorë.
Komisionerët Publikë janë duke shqyrtuar, në të njëjtën kohë, vendimin e Komisionit të Pavarur të Kualifikimit dhe Rekomandimin e Operacionit Ndërkombëtar të Monitorimit.
Bazuar në pikën 1, të nenit 63, të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, Komisionerët Publikë, brenda 15 ditëve nga data e njoftimit të vendimit, nga Komisioni i Pavarur i Kualifikimit, kanë të drejtë të paraqesin ankim pranë Kolegjit të Posaçëm të Apelimit”, shkruhet në njoftim.
Ndërkohë, gjyqtari i Gjykatës së Rrethit Vlorë Laurent Fuçia u konfirmua në detyrë nga Komisioni i Pavarur i Kualifikimit, pas rivlerësimit në të tri kriteret. Megjithatë Komisioni vendosi të trasferojë pranë Inspektorit të Lartë të Drejtësisë, njërën nga dosjet e shqyrtuara nga Fuçia.
Gjatë hetimit administrativ, të kryer nga trupa e KPK e kryesuar nga Suela Zhegu, me relatore Etleda Çiftjan dhe anëtare Alma Faskajn, Fuçisë nuk iu gjetën probleme në kriterin e pasurisë dhe figurës, por u pyet për disa prej dosjeve që kishte gjykuar dhe për të cilat kishte ankesa.
