Në javën e fundit të muajit prill, Shqipëria është përfshirë nga reshje shiu në të gjithë territorin, të shoqëruar nga shtrëngata dhe temperatura realitvisht më të ulëta se normalet për stinën.
Kjo situatë me motin në vend pritet të vijojë deri mesditën e së mërkurës, ku reshjet më intensive priten të regjistrohen në Lezhë dhe Durrës. Reshjet e shoqëruara me shtrëngata mund të shkaktojnë edhe pezullime të lundrimeve.
Specialistja e IGJEUM, Anira Gjoni foli në një emision televiziv duke thënë se edhe era do të jetë e fortë, por moti do të përmirësohet pas të mërkurës.
“Sot dhe nesër pasdite do të vijojnë reshjet në të gjithë territorit. Në Lezhë dhe Durrës do të jenë më intensive të shoqëruara me shtrëngata. Në Shkodër situata do të jetë më e qetë. Shqipëria e mesme do të ketë reshje mesatare ndërsa në Shqipërinë e jugut do të jenë të dobëta. Presim që era të jetë e fortë”, tha Gjoni.
Specialistja thekson gjithashtu se moti premton fundjavë me diell dhe me temperatura të larta deri në 25 gradë.
“Nga mesdita e së mërkurës presim që moti të përmirësohet. E enjtja, e premtja, e shtuna, e diela do të jetë me diell. Gjatë ditës së nesërme, do të kemi ulje të vogël në vlera minimale ndërsa mëngjesin e së enjtes presim të kemi zbritje të temperaturave që në fundjavë do të shënojë sërish rritje e të kapë vlerat 25 gradë”, tha Gjoni.
