“Apokaliptike” është termi i duhur për të përkufizuar tablonë në kampionatin gjerman.
Nëse i referohemi fazës së parë, as tifozët e Dortmundit nuk e mendonin se do të arrin kreun, por ja që bukuria e futbollit dhe “naiviteti” i Bajernit ka bërë që ky iluzion i dikurshëm të kthehet në realitet.
JAVA e 29-të- Kampionët në fuqi udhëtuan drejt Mainzit, me mision e qartë, rikthimi te suksesi pas një sërë javësh të ngarkuara në rezultat dhe efekte anësore (sherri Mane-Sane). Tuhel u përpoq të imitonte Nagelsmanin në lidhje me aplikimin e sistemit, e përkthyer me 3-5-2, por që përfundimi rezultoi i hidhur. Manovrat e tyre u konkretizuan në pjesën e parë me autor Sadio Manenë në minutën e 29-të pas krosimit perfekt të Kanselos nga e majta.
Fraksioni i së dytës ndryshoi temp, aty ku vendësit filluan t’i bezdisnin më shpesh në zonë miqtë. Shtatlarti Ajork bëri që tifozëria vendëse të shpërthente në minutën e 65- të me rrjetën e barazimit. Presioni asfiksues solli edhe golin e dytë me autor Barreiron 8 minuta më vonë. Martin vulosi fitore e Maincit, njëkohësisht rënia nga kreu pas triumfit të Dortmundit karshi Frankfurtit në “Signal Iduna Park”. Verdhezinjtë e hipotekuan fitoren që në 45 minutat e para më protagonistë Bellingamin, Humelsin dhe Malen. Ky i fundit përshëndeti rrjetën edhe në pjesën e dytë. Pas 29 javësh Bundesligë, Dortmundi mban kreun me 60 pikë, 1 më tepër sesa rekordmenët nga Mynihu.
REAGIMI I TUHELIT- Tekniku 49-vjeçar ka pritshmëri të mëdha në stolin e Bajernit, ndonëse pas suksesit ndaj rivalëve të Dortmundit, duket se gjithçka ka marrë për keq, qoftë në rezultate ashtu edhe në lojë. Tuhel e ka cilësuar lojën e të tijve si pa energji përballë Maincit, madje duke i dhënë tri ditë pushim mbi rigjenerimin e fuqive fizike e mendore: “Ishte evidente se zbrazëtia e energjive diktoi në kampin tonë. Ndodheshim në gjendje sikur kishim luajtur 80 ndeshje deri në këtë fazë të sezonit. Totalisht të lodhur. Sigurisht që përgjegjësia e rezultateve bie mbi mua dhe më bën të ulem e të vështroj me kujdes rreth reflektimit në duelet pasardhëse. Klubi ka humbur numër të konsiderueshëm pikësh përgjatë fazës së dytë dhe trendi nuk është pozitiv. Mbetet e papërcaktuar se çfarë efektesh do të ketë kjo disfatë në panoramën e renditjes përfundimtare dhe çështjes ‘titull’ në Bundesligë. Goditja finale pas golit të parë na kushtëzoi në ecuri. Mungesa e vendosmëria po na përndjek. Duhet t’i mbyllim sa më parë hendeqet e krijuara dhe kapërcimin e këtij momenti të vështirë, jo vetëm fizik”, tha ish-tekniku i Dortmundit në sezonet 2015-2017.
