Prej mëngjesit të së hënës kanë rinisur kërkimet nga ana e policisë dhe familjarëve të Leonard Thodhorit e Fatmir Sulovarit (alias Fatmir Krasniqi) në fshatin Vrinë dhe Kepin e Stillos, me shpresën për të gjetur trupat dy 46-vjeçarëve.
Dyshimet janë të forta se ata janë vrarë dhe groposur në këtë zonë të bashkisë Konispol.
Nga hetimet e deritanishme rezulton se Leonard Thodhori ka shitur një tokë tek persona me precedentë penalë dhe pas kësaj mes tyre ka lindur mosmarrëveshje lidhur me pronësinë dhe pagesat.
Thodhori rezulton të jetë thirrur në mirëbesim në qytetin e Sarandës për të kontaktuar me persona me të cilët ka kryer një marrëveshje për shitjen e një prone. Këta persona nuk banojnë në qytetin bregdetar.
Konflikti mendohet të ketë agravuar edhe më tej çka ka futur në funksion planin e rrëmbimit të tij. Për këtë mund të jenë përdorur si karrem duke shfrytëzuar njohjen dhe mirëbesimin, persona që kanë arritur ta marrin pa forcë Thodhorin dhe shokun e tij Sulovari në automjetin “Mercedes-Benz” në orët e para të 7 prillit.
Pasi janë futur në automjet, dy 46-vjeçarët mendohet se kanë rënë pre e planit të rrëmbyesve të cilët me pas i kanë çuar drejt fshatit Vrinë për t’i ekzekutuar e groposur.
Policia mendon se kemi të bëjmë me një strukturë të mirëorganizuar kriminale e cila është kujdesur të mos lerë gjurmë e prova. Kjo strukturë përbëhet nga persona, pjesëtarë të së cilës mund të jenë përfshirë në disa ngjarje të rënda kriminale në vendin tonë, të cilat jo domosdoshmërish kanë lidhje me njëra-tjetrën dhe që fijet i lidh herë trafiku ndërkombëtar i drogës, herë konfliktet e pronësisë e herë motivet e dobëta e deri ato banale.
Ndërkohë, mëngjesin e sotëm janë lënë të lirë të gjithë personat e shoqëruar për t’u marrë në pyetje lidhur me zhdukjen e dy 46- vjeçarëve.
Të shoqëruarit e moshës 24-64 vjeç, me banim në Sarandë, Vrinë e Konispol, shumica e të cilëve me precedentë të theksuar kriminalë për “prodhim dhe shitje narkotikësh”, “kultivim bimësh narkotike”, “trafik mjetesh motorike” etj. janë marrë në pyetje në Drejtorinë e Policisë Vlorë dhe në Komisariatin e Sarandës.
Edhe pse janë lënë të lirë, policia u ka mbajtur atyre telefonat celularë për ekspertim kompjuterik dhe disa automjete për ekspertim daktiloskopik dhe biologjik.
Hetuesit nuk kanë arritur t’i marrin në pyetje të gjithë personat e dyshuar si të përfshirë në këtë ngjarjes të veshur me mister, pasi rezulton se disa prej tyre nuk janë gjetur në banesa. Megjithatë nën vëzhgim e madje edhe nën përgjim janë vënë shumë personazhe kyç në botën e krimit në Sarandë, për të cilët policia ka prej disa vitesh informacion mbi veprimtarinë kriminale të tyre.
Pavarësisht se Thodhori e Sulovari kanë mbi supe disa precedentë penalë, ngjarja që mendohet se u ka kushtuar jetën, lidhet direkt me Thodhorin për çështje pagese për pronën dhe indirekt me Sulovarin si viktimë kolaterale e kësaj historie, por pa asnjë lidhje me precedentët e kaluar të dy viktimave apo me veprimtarinë e përditshme të tyre.
