Zgjedhjet lokale të 14 Majit sa vijnë e bëhen një misionin më i vështirë për PD e Vulës që udhëhiqet nga kryetari i komanduar Enkelejd Alibeaj.
Braktisja nga pjesa më e madhe e deputetëve që përbënin të ashtuquajturin grup parlamentar të “Alibeajt” pas krizës në PD, vetëm thellohet teksa forcat politike i afron verdiktit të shqiptarëve që do të shpaloset me votën për kryebashkiakët.
Teksa në prezantimin e Roland Bejkos në Tiranë, në një sallë me jo më shujmë se 500 persona, e mbështetën vetëm 5 deputetë përfshirë Gazmend Bardhin, tashmë duket se edhe Sekretari i Përgjithshëm i “Alibeajt” e ka braktisur anijen.
Bardhi ka treguar në vijueshmëri se shumica e vendimeve të marra nga PD e Vulës janë personale të Alibeajt dhe nuk korrespondojnë me qëndrimet e grupit apo personale të tijat, siç ishte edhe vendimi për të dalë me kandidatë në disa bashki të caktuara për zgjedhjet lokale.
Këtë qëndrim të tij asnjëanës, deputeti demokrat e ka konfirmuar sot, teksa është shfaqur në Vaun e Dejës në takime me demokratët, përkrah kandidatit të koalicionit opozitar “Bashkë Fitojmë”, Zef Hila.
Bardhi ka kundërshtuar hapur vendimin personal të Alibeajt për të garuar me kandidaten Kolmentina Drini nën siglën e PD, duke nënvizuar se favorizon kështu PSD e Tom Doshit, i cili zynon të mbajë bashkinë me kandidatin e prezantuar nga PS, Kristian Shkreli.
Në një takim me strukturat në Vaun e Dejës, ku i pranishëm ishte edhe Zef Hila, Bardhi siguroi të pranishmit se qëllimi i tij është që nga 14 maji bashkia të mos jetë më nën drejtimin e qeverisë. Deputeti theksoi më tej se me Zef Hilën kishte diskutuar edhe në vitin 2021 për kandidimin e tij në bashkinë e Vaut të Dejës.
“Ajo që dua të siguroj nga kryetari deri tek anëtari fundit në këtë sallë është se unë jam në krahun tuaj. Ajo që ju doni, është që në 14 maj, Tom Doshi në 14 maj të dorëzojë çelësat e bashkisë së Vaut të Dejës që e ka marrë pa të drejtë në vitin 2019. Jam i vetëdijshëm që kandidatura është më potencial që kur ka dalë. Madje me Zefin kemi diskutuar që në 2021-shin”, u shpreh Bardhi.
Deputeti i PD konfirmon kështu faktin se në mbledhjen ku u vendos për mënyrën sesi PD e Vulës do të hyjë në zgjedhje ai dhe deputetë me influencë në elektorat si Dashnor Sula e jorida Tabaku kërkuan që të shpallen kandidatura vetëm për këshilltarë bashkiakë dhe jo për kryebashkiakë.
Këtë qëndrim Bardhi e ka theksuar edhe në këtë takim, ku u ka kërkuar të pranishmëve që të votojnë për listën e kandidatëve për këshilltarë bashkiakë, duke e mos e përmendur kandidaten zyrtare të PD në këtë bashki, Klomentina Drini.
“PD ka paraqitur një listë të shkëlqyer për Këshillin Bashkiak të Vaut të Dejës, me gra e burra, djem e vajza që e duan Vaun e Dejës dhe qytetarët e tij. Lista kryesohet nga z. Gjon Marku, ish-kryetar bashkie, një personalitet i zonës dhe administrator lokal me integritet dhe profesionalizëm”, shkruan Bardhi.
