Ekzekutimi i biznesmenit Ardian Nikulaj në ambientet e lokalit të tij “Coral” në Shëngjin është një ngjarje e veshur me mister dhe tepër komplekse për hetuesit që synojnë ta zbardhin dhe vendosin autorët para drejtësisë, për shkak të shkuarës së tij të errët, lidhjeve në biznes dhe influencës politike në qarkun e Lezhës.
Por pista më e nxehtë që mbetet në duart e hetuesve është ajo e hakmarrjes, për shkak të ngjarjeve të vjetra, ku dyshohet se 50-vjeçari dhe familja e tij kanë qenë të përfshirë.
Një nga këto ngjarje të rënda për të cilën Nikulaj është akuzuar publikisht, është vrasja e familjarëve të Elton Lestakaj.
Ky i fundit, së bashku me të vëllanë Klodian Lestakaj e ka akuzuar 7 vite më parë Ardian Nikulajn dhe Arben Nikulajn për vrasjen e dy familjarëve, Lauren dhe Gëzim Lestakaj.
Por pavarësisht çështjes së hapur mes dy familjeve, vëllezërit Lestakaj u prononcuan sot për emisionin “Review” në EuronewsAlbania, duke mohuar të kenë lidhje me atentatin e 19 prillit, ku mbeti i vrarë biznesmeni 50-vjeçar.
Elton dhe Klodian Lestakaj shprehen nuk kanë lidhje me vrasjen e Nikulajt dhe nënvizojnë se janë të gatshëm të dëshmojnë për këtë gjë.
Ata gjithashtu theksuan se për vrasjen e familjarëve të tyre nuk është bërë drejtësi, por kjo për dy vëllezërit nuk do të thotë se kanë dashur apo e kanë menduar që të marrin gjak, pasi siç ata shprehen kërkojnë vetëm drejtësi nga shteti.
“Nuk kemi çfarë themi më shumë nga ajo ç’ka kemi kërkuar 7 vite më parë, aq më tepër që s’duam të ngjallim emocione negative në këtë rast të freskët. Edhe pse ngjarja ka ndodhur e nuk kemi përgjegjësi, ne sërish do kërkojmë sërish hetim të ngjarjes deri në fund. Nëse shteti shqiptar na garanton jetën me status dëshmitarësh, ne vijmë e përballemi në gjykata. S’kemi dashur kurrë gjak, as nuk duam, duam drejtësi në dosje. Nëse shteti shqiptar na thërrret për hetim ne vijmë menjëherë”, deklaruan ata.
