Mungesa e investimeve në infrastrukturën rrugore dhe mungesa e kanalizimeve të ujërave të zeza janë disa nga problemet që shtrojnë banorët e lagjes numër 3 në Korçë, të cilët dolën sot në protestë.
Të indinjuar nga mungesa e vëmendjes, banorët thonë se kanë marrë veçse premtime boshe në kohë fushatash dhe asnjëherë nuk është konkretizuar asgjë.
Edhe pse është lagje e qytetit të Korçës, banorët te 3-shi thonë se nuk është investuar as në kanalizimin e ujërave të zeza duke jetuar si në mesjetë me gropa septike.
Ata thonë se kanë mbi 20 vite me këtë problem që mbetet ende i pazgjidhur.
Përgjatë këtyre viteve, banorët thonë se iu është premtuar vetëm studimi i rrugës pasi nga bashkia kanë marrë si përgjigje se janë zonë informale.
Por, banorët e kundërshtojnë këtë. Ata shprehen se shtëpitë e tyre janë me dokumentacion të rregullt dhe se janë banorë të kësaj lagje dhe të qytetit të Korçës prej 23 vitesh.
