Kryeministri Edi Rama ka shkelur hapur Kodin Zgjedhor duke premtuar para dhe pas nisjes së fushatës elektorale për zgjedhjet lokale të 14 majit, rritje pagash në disa sektorë dhe bonuse prej 5 mijë lekësh të rinj për pensionistët.
Mënyra sesi shefi i qeverisë po e shfrytëzon premtimin për rritje të pagës minimale dhe bonusin është kritikuar edhe nga vetë eksponentë të kampit rozë, teksa ekonomistët e cilësojnë si një politikë të gabuar në prag të zgjedhjeve.
Në emisionin “Open” ish-deputeti i Partisë Socialiste Ervin Bushati, teksa debati me analistët u kanalizuar te bonusi për pensionistët, e pranoi hapur se lëvizja ishte elektorale, ashtu siç është dhe mbjellja e pemëve.
“Bonusi për pensionistët ishte elektoral. Jemi krenarë. Kam tre argumente për këtë, e para është ligjshmëria. Politikisht, kryeministri është politik, që nga kravata që vesh. Kjo është strategjike, sepse kemi thënë që demografia është në rrezik. Çdo gjë bëhet në funksion elektoral. Është vendimmarrja e duhur. Ndoshta sot duhet investuar te kapitali njerëzor. Puna që bën një parti, a është elektorale gjithë kohës? Është. Dalja e kryeministrit, mbjellja e pemëve dhe veshja e xhupit të Juventusit është elektorale”, tha Bushati.
