Detaje të reja kanë dalë në dritë nga vrasja e 38-vjeçares shqiptare Anila Ruçi, e cila me fytin e prerë me thikë pasditen e së mërkurës në shtëpinë e saj në një provincë të Pavias, në Itali.
Dyshimet janë hedhur mbi bashkëjetuesin e saj Osman Bilyhu, 38 vjeç, i cili u gjet pa ndjenja në oborrin e banesës, por që fillimisht u raportua se ishte vëllai i viktimës.
Sipas mediave italiane, ishte vetë 38-vjeçarja e cila punonte si kujdestare për të moshuarit që e kishte prezantuar Bilyhun tek fqinjët si vëllain e saj, por policia nuk ka gjetur prova që ata ishin të afërm.
Ndërkohë, të njohurit thanë se mes tyre kishte pasur shpesh herë zënka. Megjithatë ende nuk ka një akuzë ndaj 38-vjeçarit i cili ndodhet në terapi intensive pasi edhe ai kishte plagë thike në bark, gjoks dhe krahë.
I plagosuri nuk është marrë ende në pyetje për shkak të gjendjes shëndetësore, por edhe sepse ai nuk mund të komunikojë në gjuhën italiane.
Sakaq, mediat sqarojnë se ishte pikërisht ai që njoftoi policinë për ngjarjen e rëndë. Ai u shfaq në një lokal pranë banesës ku u kërkoi punonjësve dhe klientëve të njoftonin urgjencën, ndërsa më pas u largua drejt banesës, por humbi ndjenjat në oborr.
Ai mundi të thoshte vetëm se rreth orës 5 të mëngjesit një person i panjohur hyri në banesë, por është ende e paqartë pse krimi u njoftua 12 orë më pas.
Ky është një element ende për t’u verifikuar, ndërsa as arma e krimit nuk është gjetur ende.
Kur ekipi i emergjencës hyri në banesë gjeti gruan shqiptare të pajetë në divan të mbuluar me një çarçaf, duke konstatuar se ishte goditur me thikë në fyt.
38-vjeçarja jetonte në atë banesë prej një viti e gjysmë, ndërsa verën e kaluar asaj iu bashkua edhe Bilyhu.
