Një ngjarje e rëndë është shënuar në Shëngjin ditën e sotme ku të shtënat me armë zjarri i kanë marrë jetën biznesmenit Ardian Nikulaj.
Viktima, 50 vjeç, dyshohet se u qëllua nga dy persona teksa ndodhej në lokalin “Coral” në pedonalen e Shëngjinit, biznes që është në pronësi të viktimës.
Autori me jelek fosforeshent dhe skafandër motori në kokë ka hyrë brenda lokalit “Coral” dhe e ka qëlluar dy herë me pistoletë, për t’ia mbathur më pas me një motor.
Policia ndodhet në vendngjarje dhe po punon për zbardhjen e dinamikës së vrasjes së biznesmenit.
Sa i përket viktimës, ai është babai i 4 fëmijëve dhe njihet si biznesmen i fuqishëm e me shumë influencë në qarkun e Lezhës. Nikulaj kishte në pronësi një resort luksoz në zonën e Ranës së Hedhun.
50-vjeçari ka qenë kandidat për deputet i Partisë SocialDemokrate të Tom Doshit në zgjedhjet parlamentare të vitit 2021. Emri i tij gjithashtu renditet i 27-i në listat për këshillin bashkiak të Lezhës në zgjedhjet vendore të 14 majit, nën siglën e PSD-së.
Ardian Nikulaj ka ndërruar mbiemrin në 2003 pasi në të shkuarën ka pasur mbiemrin (Marku). Biznesmeni në të shkuarën ka mbajtur postin e drejtorit të ALUIZNI-t dhe ka qënë i dënuar për disa vepra penale.
Ai rezulton i dënuar me 4 muaj burg në vitin 2003, pasi akuzohej për “prodhim dhe mbajtje të armëve luftarake dhe municioneve dhe për “armëmbajtje pa leje”. viktima gjithashtu ka qenë i dënuar në vitin 2006, kur akuzohej për “kontrabandë e falsifikim”.
Të dyja dënimet ai i ka deklaruar edhe në formularin e dekriminalizimit që ka dorëzuar në Komisionin Qendror të Zgjedhjeve në 2021.
Në zgjedhjet e 2021 Partia Demokratike e përfshinte emrin e Nikulajt në listën e emrave që akuzonte për blerje votash në qarkun e Lezhës.
“I kanë bërë llogaritë gabim edhe Pjerin Nderu, edhe Ndrec Deda, edhe Arben Ndoka, edhe Ardian Nikulaj, edhe ushtarët e tyre. Regjimi Rama-Doshi nuk do të ketë paqe asnjë çast derisa vala e ndryshimit që kemi ngritur së bashku ta përmbysë”, shprehej asokohe ish-kryetari i PD, Lulzim Basha.
Ndërkohë edhe kryedemokrati Sali Berisha e ka akuzuar 50-vjeçarin si në zgjedhjet e 2021 ashtu dhe në ato të 2017.
“Foto e një votëblerje ditën e diele për kandidatin e Doshit, Nikulaj”, shkruantë Berisha në Facebook, ndërsa në denoncim thuhej: “Ja dhe një tjetër duke blerë vota ditë e diel për llogari të Ardian Nikulajt dhe Tom Doshit. Sapo ma nisën. Në lagjen SMT Lezhë”.
Ndërkohë, në vitin 2017 lideri i opozitës po në Facebook shkruante: “Qytetari dixhital denoncon drejtorin e ALUIZNI-t në Lezhë, Ardjan Nikulaj si: -Person me dosje të hapur për vrasje; -Person i dënuar ne Itali për shitje të lëndëve narkotike; -Person i dënuar me vendim gjykate për armëmbajtje pa leje. -Person që ka ndryshuar emrin nga Ardjan Nikulaj ne Ardjan Marku! I bëj thirrje prokurorisë së shtetit të verifikoje me përgjegjësi të lartë informacionin e qytetarit dixhital dhe vërtetësinë e tij”.
NJOFTIMI I POLICISË
Rreth orës 13:30, në rrethana ende të paqarta, është vrarë me armë zjarri, në ambientet e lokalit të tij, shtetasi A. N. 50 vjeç, banues në Shëngjin.
Shërbimet e Policisë dhe grupi hetimor kanë shkuar menjëherë në vendngjarje.
Janë ngritur pika kontrolli dhe është rrethuar zona ku vijojnë kontrollet për kapjen e autorit/ve. Grupi hetimor, në drejtimin e Prokurorisë, vijon punën për zbardhjen dhe dokumentin e plotë të ngjarjes.
