Partia Demokratike ka hapur ditën e sotme një platformë online, në mbështetje të qytetarëve shqiptarë që kanë nevojë të denoncojnë abuzimet dhe shkeljet e ligjit nga zyrtarët e shtetit në këtë fushatë elektorale.
Faqja e quajtur “Transparenca.com” tashmë është hapur në internet dhe në të jepen të gjitha sqarimet e nevojshme duke filluar që nga pyetja pse duhet të raportohet një shkelje, cilat konsiderohen manipulime zgjedhore dhe çfarë ndodh konkretisht me denoncimin që qytetari bën në PD.
Për të gjitha këto hollësi kanë dalë sot në një deklaratë para medieve, deputetja Albana Vokshi, Sekretari për çështjet ligjore në PD Ivi Kaso dhe zëdhënësja e PD, Floriana Garo.
“PD po e bën për të sensibilizuar dhe trajtuar çdo shqetësim që kanë qytetarët në lidhje me aktivitetet e paligjshme qe po kryhen në fushatë nga ana e përfaqësuesve të PS. Kemi krijuar një Task Force që do të monitorojë abuzimet zgjedhore, ka koordinatorët e saj në çdo bashki, në degë të PD të cilët raportojnë çdo ditë pranë saj për çdo shkelje apo abuzim zgjedhor.
Deri më sot kanë mbërritur me qindra abuzime, të cilat do trajtohen në vijim. Ne i diskutojmë me Task Force-n dhe vendosim nëse abuzimi duhet të shkojë në një formë kallëzimi në KQZ apo SPAK. Jemi përqendruar në raportin final të misionit ODIHR dhe atyre të zgjedhjeve të 2017-2019, për të sensibilizuar qytetarët që të denoncojmë çdo shitblerje të votës, abuzime me postin dhe Buxhetin”, tha deputetja.
