Fati i kryebashkiakut të Mallakastrës, Qerim Ismailaj, të cilit Rama i besoi rikandidimin në zgjedhjet e 14 Majit pavarësisht se në muajin shkurt u dënua nga GJKKO me 6 muaj burg, pritet të “vuloset” më 24 prill.
Në këtë datë Kolegji Zgjedhor do të shqyrtojë ankimimin e Partisë Demokratike për të mos regjistruar në zgjedhje si kandidat të PS Ismailajn. Kujtojmë se PD e Alibeajt nëpërmjet deputetit Gazmend Bardhi ka kërkuar përjashtimin e tij nga procesi zgjedhor pasi preket nga ligji i dekriminalizmit.
Në denoncimin e bërë, Sekretari i Përgjithshëm i PD tha se KQZ ka shkelur ligjin duke regjistruar Ismailajn në zgjedhje si kandidat ndërkohë që ky vendim bie ndesh me ligjet në fuqi.
Në një vendim të marrë më 10 prill Komisioni i Ankimimeve dhe Sanksioneve nuk e mori fare në shqyrtim kërkesën e bërë nga Partia Demokratike për çregjistrimin e kandidatit të PS Qerim Ismailaj për bashkinë e Mallakastrës.
Ndërkohë, Kolegji njofton se do të shqyrtojë kërkesën dhe bën me dije se trupa gjykuese do të përbëhet nga Blerona Hasa (Relatore) si dhe anëtarët Marsela Dervishi, Sokol Ibi, Emona Muҫi dhe Alma Kolgjoka.
Ismailaj është dënuar nga GJKKO teksa akuzohej për veprën penale “Falsifikimi i vulave, i stampave ose i formularëve”, pasi ka rezultuar i dënuar më parë në Greqi, ku kishte dhunuar një person në vitin 1999.
Kryebashkiaku socialist nuk e kishte deklaruar dënimin në formularin e dekriminalizimit, por ka thënë se s’ka qenë në dijeni të këtij dënimi në Greqi.
Dënimin e Ismailajt në Greqi e zbuloi vetë Partia Demokratike dhe më pas u konfirmuar nga përgjigja e letër porosisë që iu drejtua autoriteteve greke.
Sakaq, dënimi me 6 muaj burg i Ismailajt iu konvertua me 40 orë pune për interes publik.
