Drejtuesja e qarkut politik të Lezhës për PD, Jozefina Topalli ka ngritur shqetësimin e largimit të të rinjve nga Shqipëria. E ftuar në emisionin Quo Vadis, Topalli deklaroi se shqiptarët po zhduken nga keqqeverisja, ndaj duhet ndryshim.
Ajo tha se vetëm në 8 vitet e fundit, 800 mijë shqiptarë, veçanërisht të rinj, janë larguar nga Shqipëria.
Topalli ka akuzuar qeverinë Rama për keqqmenaxhim të buxhetit duke thënë se ka rritur borxhin publik dhe nuk ka rritur pagat. Ajo theksoi se gjatë kohës kur PD ishte në pushtet, borxhi publik ishte nën kontroll dhe pagat u dyfishuan.
“Ne kemi vetëm në 8 vitet e fundit 800 mijë shqiptarë, shumica e të cilëve të rinj, që janë larguar nga Shqipëria. Një vend ku ik rinia është një vend pa perspektivë. Ne do pranojmë që të zhdukemi sepse ne po zhdukemi, në qoftë se ne nuk pranojmë se po zhdukemi ne kemi një problem të madh me veten dhe kjo të stopohet duhet të bëhet diçka e madhe e fortë, e ka emrin ndryshim dhe ky ndryshim duhet të filloj që tani”- tha Topalli.
