Në Hagë po vazhdon procesi gjyqësor ndaj ish-krerëve të UÇK-së, Hashim Thaçi, Kadri Veseli, Jakup Krasniqi e Rexhep Selimi.
Sot po vazhdohet me procesin e paraqitjes së provave, përkatësisht dëgjimin e dëshmitarëve.
Dëshmitarja e parë e ZPS-së Ë4474 ka dhënë dëshminë e saj në seancë të mbyllur për publikun, sikurse edhe javën e kaluar.
Pas pyetjeve të parashtruar nga mbrojtja e Jakup Krasniqit, ajo ka përfunduar dëshminë e saj.
Më pas ka filluar të dëgjohet dëshmitari tjetër i ZPS-së dhe gjykatësi Charles Smith ka njoftuar se intervistimi i tij do të zgjasë pesë ditë.
Dëshmitari i dytë i Prokurorisë së Specializuar në Hagë ka dëshmuar lidhur me daljen publike të UÇK-së më 1998, ku pretendon se ishte prezent dhe se u zhvillua në fshatin Llaushë më 1998.
Dëshmitari i mbrojtur ka deklaruar se në ceremoninë e varrimit të mësuesit të Llaushës Halit Geci, në të cilën ceremoni doli për herë të parë në publik UÇK-ja, ishin pjesëmarrës edhe dy zyrtarë të degës së LDK-së në Malishevë.
“Dalja e UÇK-së u bë publike pas vrasjes së mësuesit Halit Geci, në varrimin e tij është bërë publike Ushtria Çlirimtare të Kosovës. E pas vrasjes së familjes Jashari i madh e i vogël u kyçën në ushtri. Me rastin e varrimit të mësuesit Halit Geci kemi qenë prezentë në varrim edhe vetë. Është fol që ka marrë pjesë edhe kryetari i degës së Skënderajt, Idriz Reci. Kanë folë ata, pas tyne janë dalë përfaqësuesit e UÇK-së e kanë lexu një tekst dhe i kanë shprehë ngushëllime”, ka dëshmuar ai.
I pyetur në lidhje me tre folësit në daljen publike të UÇK-së, ai ka thënë se më vonë ka mësuar për emrat e tre anëtarëve të cilët kishin mbajtur fjalime.
“Pastaj e kemi mësuar kush janë ata. Mujë Krasniqi, Rexhep Selimi dhe Daut Haradinaj”, ka thënë ai.
“Mujë Krasniqi ka lexuar diçka, ka bërë thirrje që të veprohet me UÇK-në e të ecim përpara. Muja ka qenë pa maskë, tjerët me maska. Më vonë e kemi kuptuar që ai pa maskë ka qenë Mujë Krasniqi”, tha më tej dëshmitari.
I pyetur nga prokurori se kush nga folësit ishte më i rreptë, ai ka thënë: “Veç me fjalë nuk arrihet lufta, pak a shumë kështu ishte fjalimi. Po [ishte Rexhep Selimi]. Më tregoi dikush që ishte ai”.
Dëshmitari nënvizoi se “fjala ishte për Lidhjen Demokratike e Kosovës”.
“Kjo sepse thanë që nuk mundemi vetëm me fjalë paqësore, por edhe luftë. U dijke kush është në Prishtinë, e kush punon në mënyrë paqësore. Në atë kuptim”, tha më tej.
