Milan nuk di më të fitojë në kampionat. Kuqezinjtë, në fakt, kanë marrë barazimin e dytë radhazi dhe mbeten në vendin e katërt të renditjes me 53 pikë duke i dhënë mundësi Inter-it ta parakalojë.
Rezultati i radhës zhgënjyes për skuadrën e Stefano Pioli-t ka ardhur në fushën e Bologna-s në ndeshjen e vlefshme për javën e 30-të të kampionatit italian të futbollit.
Përveç portierit Maignan, trajneri Pioli ka ndryshuar dhjetë lojtarë në krahasim me formacionin që ka luajtur të mërkurën kundër Napoli-t në San Siro.
Një zgjedhje kjo që ka ndëshkuar menëherë kampionët në fuqi të Italisë, duke parë se Bologna-s i kanë mjaftuar vetëm 32 sekonda lojë për të kaluar në avantazh.
Ka qenë Sansone ai që ka kaluar në avantazh kuqeblutë duke përfituar nga përgjumje e mbrojtjes mike. I pafajshëm në këtë rast Maignan, i cili nuk ka mundur të bëjë dot asgjë.
Reagimi i milanezëve ka ardhur pesë minuta para fundit të rregullt të pjesës së parë. Miqtë, në fakt, kanë arritur të barazojnë me një goditje shumë të bukur të Pobega-s nga jashtë zone.
Rezultati ka mbetur i pandryshuar në pjesën e dytë pavarësisht se rastet për të shënuar golin e fitores nuk kanë munguar për milanezët, veçanërisht pas futjes në fushë të Leao-s dhe Brahim Diaz.
