Ish-kryetarja e Kuvendit, Jozefina Topalli ka folur sot para çeljes së fushatës së koalicionit “Bashkë Fitojmë” për zgjedhjet vendore të 14 majit, në stadiumin “Air Albania”.
Në një prononcim për “Syri Tv”, Topalli tha se kjo është fushata më e veçantë që ka përjetuar ndonjëherë.
Sipas saj, kjo është një sfidë kundër përpjekjeve për të lënë PD-në jashtë zgjedhjeve vendore.
“Në fakt, është hapja e një fushate më të veçantë që kam përjetuar në jetën time, për të gjitha arsyet historike të zhvillimeve të fundit, është së pari një sfidë e madhe ndaj përpjekjeve për ta lënë PD-në jashtë këtyre zgjedhjeve, është një përgjigje fantastike e qytetarëve, e demokratëve kundër të gjithë atyre që i morën vulën dhe emrin në një përpjekje që… Por edhe një festë për të gjithë kandidatët, të cilët në shumicën e tyre janë përfaqësues dinjitozë, me dinjitet dhe shumë të respektuar në zonat e tyre.
Sigurisht, këto nuk janë thjesht zgjedhje lokale, kanë një dimension të thellë politik si një përpjekje e jashtëzakonshme për të rikthyer pluralizmin dhe për të pasur një opozitë të vërtetë, që nesër, pas dy viteve, të jetë në qeverisje, që të ndryshojë çdo gjë në jetën politike, ekonomike, sociale të vendit. në mënyrë të veçantë të ndalë fluksin e madh të shpopullimit. Dhe këtu do të them se ka shumë arsye për të cilat shqiptarët duan që të ndryshojnë qeverisja, qeveria etj. por arsyeja më e madhe është largimi i të rinjve e t’u them një gjë: Elon Musk, para pak ditësh, kur pa të dhënat e uljes së lindshmërisë së Italisë, tha: “Ky vend po zhduket”!
Dhe unë po them të njëjtën gjë për analogji në vendin tonë, se këtu kushtet janë edhe shumë më të rënda: Vendi ynë do të zhduket nëse ne nuk do të bëjmë ndryshimin! Dhe sot është një përgjigje e shkëlqyer e pjesëmarrjes së qytetarëve, e njerëzve, e demokratëve dhe gjëja më e bukur është se unë shoh prindër, nëna, baballarë edhe me fëmijët e tyre për dore si një mesazh i rëndësishëm për të thënë se unë mendoj që këta fëmijë të mos ikin nesër, po të ndryshojmë situatën që ata të jetojnë këtu.”- tha Jozefina Topalli.
