Reperi Rigels Rajku ishte ndër të parët në vend që shfrytëzoi hapësirën e re të krijuar nga DPSHTRR për të paguar një tarifë ekstra në mënyrë që të përfitonte targa të personalizuara, një format që përdoret prej kohësh, kryesisht në Britaninë e Madhe.
Noizy vendosi emrin e tij të artit në targën e makinës së llojit “Lamborghini” që ai i shtoi rishtazi koleksionit të tij të automjeteve luksoze.
Drejtori i DPSHTRR, Blendi Gonxhe ka zbuluar sot edhe shifrën që i është dashur të paguajë reperi për këtë privilegj.
“Kjo targë që ka marrë dhe këngëtari Noizy hyn te kombinimet me 6 karaktere dhe duhet të jetë diku te 2.2 milionë lekë të vjetra”, tha Gonxhja për EuronewsAlbania.
Gonxhja u shpreh se të tilla targa mund të mbarten nga mjeti në mjet, me kriterin që mjeti tjetër të jetë më i shtrenjtë se i pari.
Drejtori i DPSHTRR shtoi se deri tani ka 996 aplikime për targa të personalizuara dhe se kërkesa të tilla kanë arkëtuar 24.5 milionë lekë të reja.
