Policia e Spanjës ka çmontuar një organizatë kriminale me bazë në Benidorm, që merrej me kultivimin e marijuanës në provincën e Alicante dhe shpërndarjen e saj të mëvonshme në të gjithë Evropën.
Në pranga kanë rënë 13 anëtarët, 10 burra dhe 3 gra, me kombësi shqiptare, me përjashtim të njërës prej grave që ishte me kombësi spanjolle.
Hetimi policor nisi si rezultat i informacioneve të ndryshme që grupi hetimor trajtonte për ekzistencën e një grupi kriminal me qendër në provincën e Alicante-s. Policia ka marrë informacione edhe nga një prej kompanive të shpërndarjes së energjisë elektrike që bashkëpunon ngushtë me Forcat dhe Organet e Sigurisë së Shtetit për zbulimin e mashtrimeve në furnizimin me energji elektrike.
Informacioni i dhënë nga kompania elektrike tregonte konsum të tepërt të energjisë elektrike me humbje në rrjet nga ndërtesa dhe shtëpi të ndryshme industriale në qytetin e Benidorm të Alicante.
Për këtë arsye, agjentët nisën një hetim për zbardhjen e këtij konsumi të tepruar që në përgjithësi tenton të zbulojë instalime elektrike mashtruese ose të paligjshme që furnizojnë me energji elektrike kulturat e marijuanës në ambiente të mbyllura , siç u zbulua më vonë nga hetimi.
Agjentët kryen vëzhgime të shumëfishta në vendet e hetuara, nëpërmjet të cilave mundën të identifikonin trembëdhjetë anëtarët e grupit, duke përcaktuar se ata formonin një organizatë kriminale të strukturuar në mënyrë të përsosur dhe hierarkike, ku secili prej tyre luante një rol të veçantë.
U zbulua se marihuana kultivohej në shtëpi dhe magazina të ndryshme industriale të vendosura në qytetet Benidorm, La Nucía, El Albir dhe Almoradí, dhe më pas bëhej gati për transport e shpërndarje në vende të ndryshme të Evropës.
Në kontrollet e kryera u sekuestruan 1490 bimë marihuanë në gjendje të avancuar zhvillimi dhe lulëzimi , 350 gramë sytha marihuane, 7000 euro cash, tre automjete të përdorura nga të arrestuarit për transportin e drogës, mes të cilëve një kamion i vogël, një end jet ski dhe mjete të shumta për kultivimin dhe trajtimin e këtyre lëndëve narkotike.
