Idaet Rusi nga Pogradeci, në Dhjetor 2018 bleu me këste një frigorifer në Korçë. Mirëpo, sheh, që në Prill 2023, paga i ishte bllokuar.
Kur interesohet, i thonë, se urdhrin e ka lëshuar përmbaruesi Fatos Alimadhi. Përmbaruesi kontaktohet nga qytetari, por ai i thotë, se është sëmurë, rrëfen denoncuesi për emisionin “Stop”.
Denocuesi: Në vitin 2018, në Dhjetor, më 29 e kam blerë. Kam marrë një frigorifer në Korçë. Meqë ashtu, e mora me ofertë, pagova 200 mijë Lekë në dorë dhe 300 mijë Lekë më thanë me kredi, me këste. Ajo kushtonte 500 mijë Lekë të vjetra. 300 më ngeleshin, për të paguar. Më thanë, që për tri muaj, 45 mijë Lekë ishte fitimi. Vete të marr rrogën unë, më janë ndaluar 260 mijë Lekë pardje qe… Më thanë që e ke të bllokuar nga Fatos Alimadhi. Dimë ne! Ke qenë debitor. Dimë ne, çfarë kredie ke pasur, më thanë. Me përmbaruesin komunikova unë, më tha “jam i sëmurë”. Më tha “do flasim për nesër. Jam i sëmurë”. Për mua duket vjedhje e hapur.
Denoncuesi ka ruajtur të gjitha faturat që pasqyrojnë pagesat e kryera.
Denocuesi: Për tri muaj në postë kam paguar nga 115, 345, 300 e tyre e pagova dhe 45 mijë plus që e morën fitim ata (dyqani).
Gazetarja e “Stop” kontakton përmbaruesin Fatos Alimadhi duke pretenduar të jetë mbesa e Idaet Rusit në mënyrë që të kuptojë pse i është bllokuar paga këtij të fundit.
Gazetarja: Atëherë, unë jam mbesa e Idaetit. Ju i keni bllokuar pagën këtë muaj për një blerje që ai ka pas bërë të një frigoriferi. Ju kujtohet si rast?
Fatos Alimadhi: Nuk i ka bërë tek unë blerjet, se unë jam përmbaruesi.
Gazetarja: Po ju jeni përmbaruesi dhe ju i keni bllokuar pagën. Ai më tha që ka folur me ju dje dhe ju nuk i keni dhënë asnjë sqarim pse kur ai e ka shlyer.
Fatos Alimadhi: Unë i thashë, të të sqaroj! Nuk kam qenë në punë prej 4 ditësh për arsye të shëndetit por ai e ka mendjen të më shajë, të fyejë, të më çoje te “Stop”-i, ku di gjë unë. I thashë “Më lër, do merrem me atë punë, për të sqaruar situatën”.
Gazetarja: Po si është situata?
Fatos Alimadhi: Po situata është, që mua më ka ardhur një urdhër ekzekutimi, një kontratë që ka bërë ai me palët dhe kam bërë me procedurat.
Gazetarja: Ju si përmbarues si mund t’i bllokoni pagën kur duhet t’i vërtetoni?
Fatos Alimadhi: Megjithatë, do merrem me atë punë, do e sqaroj situatën.
Gazetari: Ju vazhdoni prapë zoti Alimadhi me këto gjëra, nuk keni mësuar ngga ato që keni bërë?
Fatos Alimadhi: Zotëri, po ku e di ti se çfarë kam bërë? Jam brenda ligjit këtu.
Gazetari: Është marrë vendimi për heqjen e licencës. Ndërkohë ju vazhdoni punën si normalisht.
Fatos Alimadhi: Edhe kjo do bëhet, se e kërkoni ju të “Stop”-it?
Gazetari: I nderuar, ju keni vepruar gabim dhe jashtë ligjit sepse procedurat tuaja janë hetuar nga ministria, por është bërë një hetim i thelluar për të gjitha procedurat, si në këtë rast, i nderuar zoti Alimadhi ku ju nuk e keni vërtetuar dhe nuk e keni bërë punën siç duhet sepse zotëria i ka paguar.
Fatos Alimadhi: Po jo mor zotëri, unë i kam kryer procedurat sipas ligjit.
Sapo përmbaruesi kupton, se është denoncuar përsëri në emisionin “Stop”, i heq sekuestron qytetarit Idaet Rusi.
