Një fluks i shtuar emigrantësh është vënë re mëngjesin e sotëm në hyrje të pikës kufitare të Kapshticës.
Qindra emigrantë shqiptarë, kryesisht nga zona e Pogradecit, Korçës dhe Ersekës kanë zgjedhur të kthehen në vendlindje për të festuar Pashkët ortodokse.
Nga pamjet e siguruara shihen radhë të gjata automjetesh që presin të kalojnë në drejtim të Shqipërisë, ndërsa bëhet me dije nga autoritetet se gjatë 24-orëve në pikën e kalimit Kufitar Kapshticë kanë hyrë mbi 5000 qytetarë.
Mësohet se kjo pikë kufitare po punon me 4 sportele në hyrje dhe 2 në dalje, për të bërë të mundur kalimin e shpejtë të qytetarëve dhe për të shmangur radhën.
Fluksi i krijuar këtë paradite pritet të vijojë edhe gjatë fundjavës.
