Gledian Llatja në Elbasan dhe Emiriana Sako në Durrës sipas deputetit demokrat Dashnor Sula janë dy kryebashkiakë anonimë që nuk i njeh as administrata dhe përfaqësojnë lidhje të grupeve të caktuara me influencë, që s’kanë lidhje me hallet e problemet e vërteta të qytetarëve.
“Llatja i Elbasanit, nuk e njeh as administrata, Sakon në Durrës po ashtu. Totalisht anonim, pa diskutim. Kanë interesa të grupeve të caktuara. Kane interesa brenda mazhorancës që i kanë mbajtur. Ne i dimë lidhjet dhe interesat që kanë grupet e caktuara. Të jeni të sigurt që bëhet fjalë për njerëz që nuk kanë lënë gjurmë gjate këtyre 4 viteve dhe nuk kanë drejtuar bashkitë”, tha deputeti demokrat.
Duke folur në Panorama TV për zgjedhjet lokale të 14 majit, Sula argumentoi me bindje se nëse mazhoranca nuk ndërhyn në proces duke blerë vota apo angazhuar eksponentë të krimit, këto dy bashki i fiton opozita.
Ai vlerësoi kandidatin e Durrësi, Igli Cara si një person me integritet, ndërsa theksoi se Elbasani është 100% i fituar.
“Të garantoj nëse mazhoranca nuk prek zgjedhjet, nuk do përdorë para, nuk do përdore të fortët, opozita korr sukses. Nuk po ju thotë një deputet ekranesh, por një deputet që rri në terren. Elbasani është 100% që fitohet nëse këta nuk ndërhyjnë. Belshi po ashtu, edhe Peqini. Në Elbasan 3-4 bashki janë të marra nga 7. Edhe Durrësi. Këta do përdorin çdo mjet. Është porti i Durrësit, do bëjnë të pamundur që ta ndalojnë ndryshimin në Durrës. Igli Cara është i fituar. Është një burrë zotëri”, u shpreh Sula.
