Nga Boldnews.al
Prokuroria e Vlorës ka nisur hetimet, pas Kontrolli i Lartë i Shtetit zbuloi situatën skandaloze, në të cilën mbaheshin ushqimet në Qendrën e Personave me Aftësi të Kufizuar në qytetin bregdetar.
Burime të besueshme nga institucioni hetimor në Vlorë bëjnë me dije për “Boldnews.al” se prokurori Arjan Xhaferraj ka urdhëruar sekuestrimin e dokumentave, të cilat lidhen me blerjen e magazinimin e ushqimeve, si edhe me procedurat e rikonstruksionit dhe mirëmbajtjes së godinës e të magazinave ushqimore të Qendrës.
Në kuadër të hetimit të regjistruar për “Shpërdorim detyre”, oficerët e Policisë Gjyqësore të Prokurorisë së Vlorës kanë kryer këtë të Mërkurë kqyerjen mbi gjendjen e punimeve të kryera mbi godinën, si edhe është kërkuar informacion nga Bashkia e Vlorës nëse është marrë në dorëzim ndërtesa pas rikonstruksionit.
Po ashtu, nesër është parashikuar që të kërkohet informacion mbi zyrën rajonale të Agjencisë Kombëtare të Ushqimit, nëse kanë kryer inspektim në Qendrën e Personave me Aftësi të Kufizuar dhe cilat janë rezultatet e kontrolleve.
Prokuroria e Vlorës ka përgatitur gjithashtu edhe një listë me emrat e zyrtarëve përgjegjës, të cilët do të pyeten në ditët në vijim për të dhënë versionin e tyre mbi situatën e konstatuar nga Kontrolli i Lartë i Shtetit.
Pak ditë më parë, KLSH publikoi gjetjet e rënda, në përfundim të auditimit të kryer në Qendrën e Personave me Aftësi të Kufizuar.
Sipas audituesve shtetërorë, “konstatohet se përveç sasisë së madhe të furnizuar nga kontraktori, artikujt e mësipërm janë magazinuar në kushte tejet të këqija higjeno – sanitare duke shkelur çdo standard ushqimor, artikujt janë magazinuar në zyrën e magazinieres, disa rifuxho në çimento dhe disa në ambjente akulli në frigorifer, pulat ishin të pa paketuara dhe disa të prishura me erë të rëndë dhe ngjyrë të transformuar, mishi në sasi 5 kg pa prerë 2 qese, patatet, qepët, frutat, rifuxho në kushte lagështie pa peshuar, pa u etiketuar mallrat,etj”.
Po ashtu, inspektorët e KLSH konstatuan se “gjendja fizike e disa artikujve nuk mund të evidentohej pasi ishin në kushte të papërshtatshme peshimi, etiketimi, higjeno sanitare. Në procesverbalet e mbajtura për artikujt ushqimorë citohej se janë në përputhje me specifikimet teknike, por nuk analizohej asnjë specifikim teknik i kërkuar me detaje të hollësishme në dokumentet e tenderit”.
