Fushata elektorale e 14 majit ditën e djeshme nisi frikshëm me një shpërthim tritoli ndaj makinës së kreut të PD-së së Vaut të Dejës, Benard Ndrecës.
“Sulm me motive politike” e ka konsideruar kreu i PD-së së Vaut të Dejës, Benard Ndreca, shpërthimin me tritol të makinës së tij tip “Audi” në orën 07:10 të paradites para oborrit të banesës së tij në fshatin Paçram.
Nga detajet e para të hetimit bëhet me dije se rreth 50 gram lëndë eksplozive ka qenë sasia e vendosur në mjetin e kryedemokratit të Vaut të Dejës. Ky është konkluzioni i arrirë nga forcat xhenio pas ekspertimit të mjetit që shpërtheu në momentin kur Ndreca nisi për t’u larguar me makinë.
Për shpërthimin e një dite më parë në mjetin e kreut të PD në Vaun e Dejës, policia deri me tani ka shoqëruar 6 persona. Ata janë marrë në pyetje lidhur me ngjarjen, por nuk ka ende të ndaluar. Ndërkohë grupi i ekspertizës po analizon në detaje mjetin e Ndrecës për të zbuluar gjurmë të mundshme që 2 autorët mund të kenë lënë pas në momentin që montuan lëndën plasëse.
Gjithashtu bëhet me dije se grupi hetimor ka sekuestruar dhe kamera të tjera të sigurisë në zonë për të parë lëvizje të autorëve pasi janë larguar nga banesa e Ndrecës. Ende dyshimet janë të forta që mjeti mund të jetë shpërthyer me telekomandë. Ndreca nuk u plagos pasi eksplozivi kishte rënë në tokë para të shpërthente. Nëse do kishte ndodhur e kundërta, pasojat mbi kreun e PD-së lokale do të kishin qenë mjaft të rënda.
Kujtojmë se Ndreca u shpreh se nga kamerat e sigurisë janë pikasur dy persona, që në një kohë për rreth 7 minuta kanë vendosur lëndën plasëse në pjesën e përparme të mjetit. Ndërkohë lidhur me incidentin kanë reaguar zyrtarë të lart të shtetit, duke e dënuar aktin si terrorist dhe të shëmtuar.
- Pamjet VIDEO
Ashtu siç Ndreca tregoi para mediave, janë dy persona të maskuar që përreth 7 minuta në orën 1:15 të natës, montojnë lëndën palsëse në pjesën e përparme të “Audi-t”, që shpërtheu sapo ai e ndezi dhe u nis për në punë.
Në një video të dytë shihet momenti kur makina e Ndrecës shpërthen. Për t’i ardhur në ndihmë atij, vrapon nëna e kreut të PD-së së Vaut të Dejës, e cila dëgjohet të thotë: “Nard…Nard mor….Ah e mjera unë”.
