Atentati me tritol ndaj kreut të Partisë Demokratike në Vaun e Dejës, Benard Ndreca ka sjellë reagime të forta nga dy liderët e koalicionit opozitar “Bashkë Fitojmë”, Sali Berisha dhe Ilir Meta.
Pas Berishës që dënoi sulmin dhe e cilësoi të motivuar politikisht, duke akuzuar kryeministrin Edi Rama se inauguroi fushatën e 14 majit me tritol, edhe Meta nënvizon se kemi të bëjmë me një akt terrorist.
Meta ka akuzuar qeverinë për atentatin e ndodhur në Vaun e Dejës, duke e cilësuar vendosjen e tritolit në makinën e Ndrecës si akt cubash të pabesë, me qëllim frikësimin e opozitarëve.
“Solidaritetin më të fuqishëm me Bernard Ndrecën, Kryetarin e PD në Bashkinë e Vaut të Dejës për aktin terrorist me të cilin u provokua sot së bashku me familjen e tij. Një regjim i pashpresë për t’u ballafaquar me qytetarët, që vetëm i ka mashtruar dhe vjedhur, inskenon akte të tilla cubash të pabesë me qëllim frikësimin e opozitarëve”, shkruan Meta në rrjetet sociale.
Në vijim, kreu i Partisë së Lirisë nënvizon se “asgjë nuk e ndal Opozitën e Bashkuar me të gjithë qytetarët e ndershëm për të ndëshkuar regjimin e bandave më 14 Maj”.
“Asgjë nuk e ndal Fitoren e Zef Hilës në Bashkinë e Vaut të Dejës dhe Fitoren 5 me 0 në të gjithë Qarkun e Shkodrës”, shkruan Meta.
