Dosja e operacionit “Plumbi i Artë” ka bërë që Gjykata e Posaçme të mos kursejë dënimet as për vetë policinë.
GJKKO ka vendosur sot që të dënojë me 2 vite e 4 muaj burg ish-shefin e Krimeve në policinë e Elbasanit, Leonard Palushi, i cili u arrestua gjatë operacionit “Plumbi i Artë” dhe nga SPAK u gjet fajtor për akuzën e “korrupsionit pasiv të personave që ushtrojnë funksione publike’’.
Ish-zyrtari i lartë i policisë akuzohej se i shërbente Erion Alibejt, i cili ndodhet pas hekurave si drejtues i një grupi të kriminal, në këmbim të një mjeti që ka marrë si dhuratë prej tij.
Palushi u vu në prangat e policisë pas dëshmisë së të bashkëpunëtorit të drejtësisë Nuredin Dumani, i cili me dëshmitë e tij çoi drejt zbardhjes disa ngjarje të rënda kriminale.
Ai akuzohej për tjetërsimin e provave të vrasjes së Emiljano Ramazanit i shtyrë nga Erjon Alibej, me qëllim për të ndjekur penalisht persona të pafajshëm e kundërvënë grupit kundërshtar të Talo Celës, kundrejt përfitimit të një automjeti nga Erjon Alibej, që më pas e ndërroi me një tjetër për të humbur gjurmët e aktit korruptiv.
Sipas SPAK, Leonard Palushi futi një armë në servisin e Albert dhe Seit Manhasa, në mënyrë që ndaj tyre të ngrihej akuza për vrasje, por që më pas për mungesë provash u rrëzua dhe dyshja në fjalë u lanë të lirë.
Ngjarja u regjistrua gjatë kohës që Palushi shërbente si shef i krimeve në Elbasan, dhe ushtroi kontroll në servisin e familjes Manhasa.
Referuar hetimeve ka rezultuar se arma me të cilën u vra Emiljano Ramazani në gusht të vitit 2020, është ajo që u vendos qëllimisht në servisin në Peqin me qëllim përplasjen e dy grupeve kriminale që nuk kishin lidhje me ngjarjen.
Emiljano Ramazani, babai i katër fëmijëve u ekzekutua në korrik të 2020 me pesë plumba në makinën e tij.
Viktima mësohet se po hynte në mes të dy pallateve për të parkuar mjetin e tij, ndërsa një nga autorët ka parkuar mjetin buzë rrugës dhe tjetri ka zbritur dhe me hap të shpejtë ka arritur ta qëllojë me pesë plumba viktimën në momentin që ky i fundit ishte duke parkuar.
Më pas, autorët janë larguar duke djegur makinën në një zonë të pyllëzuar, në Papër. Policia gjeti në mjetin e djegur edhe dy armë të tipit kallashnikov.
