Analisti Lorenc Vangjeli tha në emisionin “Të Paekspozuarit” se kjo fushatë është më e varfër se të tjerat dhe më e qetë, sepse të gjithë janë bindur për rezultatin. Sipas tij Rama ka luksin edhe të mos fitojë në zgjedhjet vendore të 14 majit, por po pret edhe një herë që të humbin kundërshtarët e tij.
“Paraja do të jetë kryefjala e kësaj fushate. Ndryshe nga herët e tjera do të jetë më e varfër, sepse përballë një opozite që ka hyrë në vitin e 10 të saj dhe burimet që e furnizojnë atë janë modeste, qeveria shtrytëzon luksin që të bëjë në dukje një fushatë me më pak para.
Ndër vite kurba e shpenzimeve është rritur gjithnjë e më tepër, ajo që jepet legalisht nga shteti ishte gjithnjë e njëjta dhe ky hendek mbushej me prurje të dyshimta.
Cili është luksi që do të përdorë Rama që thotë se nga 500-600 mijë euro gjysmat do t’i përdorë për të mbjellë pemë? Ngjan si një premtim i prekshëm, madje i shkruan edhe kryetarit të bashkisë së Shkodrës. Nëse nuk ka një transparencë të plotë mbi këtë histori, e gjithë pjesa tjetër do të jetë fjalë në erë.
Kjo fushatë do të jetë edhe më e varfër, edhe më e qetë. Kanë hyrë në një garë që nuk është garë. Janë të bindur të gjithë për rezultatin. Edi Rama ka luksin edhe të mos fitojë, por pret edhe një herë që të humbin kundërshtarët e tij”-tha Vangjeli.
