Banorët shprehen se pavarësisht ankesave të tyre të herë pas hershme, asnjëherë nuk është marrë ndonjë masë për rregullimin e këtij segmenti rrugor mjaft të rëndësishëm për ta.
“Makina dëmtohet, asnjë lloj investimi as ujësjellës as kanalizim i ujërave të zeza asgjë. Ne kemi bërë kërkesa disa herë për këtë rrugë, para fushatash edhe pas fushatës. Fondi i kësaj rruge ka pas ardhur disa herë por nuk dihet se ku kanë përfunduar ato para. Bashkia kujtohet që të hedhë një rrugë çakull sa të marrin votat dhe në fund nuk ndodh asgjë”,- shprehet banori për mediat.
Fshati Thanasaj, në njësinë administrative Dushk, është fshati më në skaj të kësaj bashkie buzë lumit Shkumbin, por kjo largësi nga qendra e Lushnjes, duket se ka bërë që kjo bashki ta harrojë dhe të mos e konsiderojë si fshat të sajin.
Ndonëse, zona ku kalon kjo rrugë është mjaft produktive, duke gjeneruar te ardhura nga kultivimi i perimeve nëpërmjet serave, infrastruktura lë shumë për të dëshiruar.
