Lideri i opozitës, Sali Berisha nga Durrësi ku prezantoi Igli Carën si kandidatin e koalicionit “Bashkë Fitojmë” për zgjedhjet lokale të 14 majit, i dërgoi një mesazh të drejtpërejtë ish-kryebashkiakut Vangjush Dako dhe drejtorit të OSHEE-së, Ardian Çela.
Berisha e lidhi kandidaturën e Emirjana Sakos me paraardhësin e saj, duke thënë se “del nga sirtarët e Gjushit”, i cili është shpallur non-grata nga SHBA.
“A nuk është një thirrje t’i largojmë. Nuk paguajmë asgjë më shumë se sa indiferencën tonë, s’duhet të ecim të përgjumur. Ju ftoj që këto ditë që kemi para deri më 14 maj të bëjmë gjithçka, të trokasim në çdo zemër dhe çdo derë për të vendosur Igli Carën kryetar të Bashkisë. Ajo zonja që është del nga sirtarët e Gjushit, ka një dyshe më mafioze në Shqipëri por edhe në Ballkan e më gjerë”, u shpreh ai.
Sipas liderit të demokratëve, Dako duhet të dalë dhe t’i tregojë durrsakëve sesa para nga taksat e tyre ka përdodur për të paguar ish-agjentin e FBI, Charles McGonigal për t’i pastruar imazhin në SHBA.
Ndër të tjera, Berisha e cilësoi binomin Dako-Çela si dyshen më mafioze në Shqipëri e Ballkan.
“Gjushi dhe Ardian Çela, mikpritësit e Massimo Denaro, nxënësit e tij në Shqipëri. Gjush thuaj durrsakëve sa para nga taksat e tyre i ke dhënë McGonogal. Do ta gjejmë dhe do të bëhesh përgjegjës për to. Në respekt të qytetarëve të Durrësit i sugjeroj Igli Carës ta ftoj në debat Sakon, të marrë suflerët me vete, Gjushin e Çelën aty mbrapa, ti marrë, ti marrë se nuk flet dot ajo.
Ndërton konstruksione betoni vetëm për të vjedhur, Në Durrësin e ri kolektori i hapur, rrugë të pashtruara. Nuk pyesin për qytetarët, pyesin vetëm për llogaritë e tyre bankare. 14 maji është fundi i Gjushit, fundi i Ardian Çelës, fundi i Edi Ramës”, tha Berisha.
