Detaje të reja kanë dalë në dritë në lidhje me krimin e ndodhur rreth orës 04:00 të mëngjesit të sotëm në Shkozë të Tiranës.
Ka qenë dëshmia e nënës së 43-vjeçarit Roland Sinani për hetuesit, ajo që ka zbardhur dinamikën e krimit të rëndë, ku ai vrau bashkëshorten e të vëllait, e më pas veten në oborr.
Rolandi është zgjuar rreth orës 03:00 të mëngjesit dhe rreth një orë më pas ai ka hyrë në dhomën e gjumit ku flinte kunata (me të bijën 2 vjeçe), të cilën e ka qëlluar me një plumb në gjoks duke e lënë të vdekur në vend.
E ëma e tij ka dëgjuar të shtënën dhe është ngritur menjëherë, ndërsa në korridor ka parë të birin, i cili i ka thënë vetëm dy fjalë: “E vrava”.
Sipas dëshmisë së saj, 43-vjeçari më pas ka dalë në oborr dhe në këtë moment ajo ka dëgjuar të shtënën tjetër me të cilën ai qëlloi veten nën nofull, duke u vetëvrarë.
E ëma e Roland Sinanit ka zgjuar bashkëshortin e saj, me këtë të fundit që pasi ka parë tmerrin në shtëpinë e tij, ka dalë dhe armën që i biri përdori për të vrarë nusen e shtëpisë e më pas veten e ka fshehur pas banesës.
Dëshmia e të moshuarit ka qenë kontradiktore dhe nuk është konsideruar si e saktë nga hetuesit për shkak se ky i fundit vuan prej kohësh nga skleroza. Për këtë arsye babai i 43-vjeçarit nuk është arrestuar, pasi gjendja e tij shëndetësore e rrëzon pistën e shoqëruar me dyshimin se kishte fshehur armën për të mbuluar ngjarjen.
Ndërkohë 43-vjeçari jetonte në një banesë me prindërit, vëllain dhe familjen e tij. Prej 5 vitesh ishte i papunë pasi vuante nga depresioni. Madje ai shpeshherë ankohej edhe për dy fëmijët e vëllait për zhurmën që bënin, pasi shprehej se nuk i duronte dot.
