Kandidati i koalicionit opozitar “Bashkë Fitojmë” për bashkinë e Kamzës, Arjan Hoxha, i ftuar në studion e Syri Tv, shpalosi objektivat e tij në fushatën elektorale për bashkinë e Kamzës.
Pas 14 majit, Hoxha tha se në bashkinë e Kamzës do të marrë fund paligjshmëria.
Ai paralajmëroi se do të rishikojë çdo leje ndërtimi dhe tender që ka dhënë Rakip Suli prej vitit 2019.
“Do të rishikohet çdo leje e dhënë deri tani, jo vetëm leje ndërtimi, janë dhënë tendera, janë 34 tendera me flamuj të kuq, në Kamëz, është abuzim. Çdo tender i dhënë, çdo abuzim që ka bërë zoti Suli, edhe pse nuk ka firmosur vetë, ka autorizuar vartësit e tij të cilët nuk janë banorë të Kamzës se thotë nuk gjeta njerëz të kualifikuar, janë 160 mijë banorë të cilët ai i tall. Kamza është një burim që furnizon me krah pune, ekspertë, inxhinierë, pedagogë edhe njhë pjesë të madhe të funksioneve administruese të Tiranës dhe nuk paska për në Kamëz 10 drejtorë të kualifikuar”, u shpreh ai.
Hoxha u ndal edhe te fondet e rindërtimit ku akuzoi bashkinë se i ka shpërndarë në mënyrë selektive.
“Fondet e rindërtimit janë një gropë e madhe në bashkinë e Kamzës. Janë shpërndarë në mënyrë klienteliste, selektive, kemi pronarë me 2-3 banesa, pjesë e strukturave të PS, kanë përfituar nga fondet e tërmetit. Ndërsa kemi persona të tjerë të klasifikuar me DS3, DS4 dhe DS5 nuk kanë marrë asnjë ndihmesë. Kemi edhe fondet e përmbytjeve. Një rast për Guinness, është dëmshpërblyer për përmbytjen një banor i katit të dytë dhe ai i katit të parë që është demokrat nuk i është dhënë asnjë lek. Është në Valias ky rast“, theksoi Arjan Hoxha.
