Kryeministri Edi Rama ka reaguar në lidhje hartën ku Kosova ishte pjesë e Serbisë në një aktivitet për turizmin, ku e pranishme ishte edhe zv.kryeministrja Belinda Balluku. Edhe pse ajo hartë është turpëruese për kombin, Balluku qëndroi tepër indiferente.
Por sot kryeministri edhe pse e ka pranuar mungesën e hartës së Kosovës është justifikuar me faktin që “Spanja ashtu e ka hartën e rajonit”.
Përmes një reagim në rrjetet sociale, Rama shkruan se harta është përdorur gjatë prezantimit të një kompanie spanjolle dhe duke qenë se Spanja nuk e njeh Kosovën, harta e rajonit prezantohet në atë mënyrë.
Gjithsesi, kryeministri shton se kurrsesi, të ftuarve nuk mund tu kontrollojë prezantimet që të shmangen gjëra të tilla duke qenë se konferenca e një dite më parë nuk ishte sheshbeteja diplomatike për njohjen e Kosovës nga Spanja.
Postimi i Ramës:
Kinse patriotët kanë gjetur punë sot duke u marrë me një hartë të prezantimit të presidentit të gjigandit spanjoll Melia Group në konventën e turizmit, ku mungonte Kosova!Dihet që Spanja ashtu e ka hartën e rajonit po asgjë e keqe s’i erdhi kombit nga dalja 1 minutë e asaj harte! Shqipëria s’është Irani ku të ftuarve në konferenca ndërkombëtare u kontrollohen prezantimet dhe as konventa s’ishte sheshbeteja diplomatike për njohjen e Kosovës nga Spanja! E keqja kombit tonë i vjen bash nga ata që merren tërë ditën me kësi luftrash pa lidhje mes shqiptarësh!
