Ditën e djeshme është mbyllur faza e tretë e kampionatit shqiptar dhe tashmë Abissnet Superiore ka hyrë në fazën më të nxehtë të tij. Skuadrat tashmë kanë nisur të bëjnë edhe llogaritë e tyre dhe pikët që do t’u duhen në këto 9 ndeshjet e mbetura për të arritur te objektivat e vendosura.
Por para se të nis edhe faza e fundit e kampionatit, i hedhim një dy edhe pikëve që ekipet kanë marrë gjatë fazës që lamë pas. Skuadra që ka surprizuar në 9 ndeshjet e fundit është padiskutim Kukësi i Rraman Hallaçit.
Verilindorët kanë arritur që nga vendi i fundit që mbanin në fazën e dytë me vetëm 8 pikë të grumbulluara, në fazën e 3-të kanë bërë mjaft mirë duke u pozicionuar të dytët me 16 pikë.
16 pikë të grumbulluara vetëm në fazën e tretë tregojnë se Hallaçi ka gjetur “kurën” e duhur për kuksianët. Gjatë kësaj faze kanë marrë 5 fitore, ndaj Tiranës, Partizanit, Kastriotit, Bylisit dhe Laçit, ndërsa janë ndalë në barazim me Erzenin, kurse janë mposhtur nga Teuta, Vllaznia dhe Egnatia.
Në këtë fazë vetëm Partizani ka arritur të bëjë më mirë, me demat që kanë grumbulluar 1 pikë më shumë se verilindorët, ndërsa nga ana tjetër djemtë e Hallaçit lënë pas në këtë renditje Egnatian me 15 pikë, Teuta dhe Tirana me nga 13, Erzeni me 11, Vllaznia dhe Laçi me nga 10, Bylisi me 9, ndërsa në fund Kastrioti me vetëm 8 pikë.
Nëse kampionëti do të kishte vetëm fazën e tretë verilindorët do të ishin nënkampionë të Shqipërisë dhe pjesmarrës në Conference League, kompeticion që kërkohet nga gjithë kuksianët.
Kujtojmë se tashmë pas 3 fazave të përfunduara, Kukësi ndodhet në vendin e 6-të me 35 pikë. Verilindorët kanë shënuar 24 gola, ndërsa kanë pësuar 28, duke pasur një golavarazh negativ me -4.
