Një nga shqetësimet kryesore të Rusisë nuk është gjë tjetër veçse marrëdhënia e saj me Organizatën e Traktatit të Atlantikut të Veriut (NATO).
Prej vitesh ajo ka qenë kundër ndërhyrjes së vendeve perëndimore në zonën e saj të ndikimit politik, prandaj ka qenë e kujdesshme që vendet e Evropës Lindore t’i bashkohen NATO-s.
Por, tani që Finlanda u bë pjesë e kësaj organizate, Rusia ndan rreth 1300 kilometra kufi me NATO-n.
Pavarësisht se vendi nordik nuk do të bëhet pjesë e NATO-s deri të martën, gjatë ditës së hënë autoritetet ruse kanë siguruar se nga ana e tyre do të ketë një përgjigje.
Këtë e ka bërë të ditur zëvendësministri i Jashtëm rus, Aleksandër Grushko. Ai ka theksuar se “një pjesë e masave tashmë janë shpallur”.
“Ne do të forcojmë potencialin tonë ushtarak në kufijtë perëndimorë dhe veriperëndimorë”, tha ai.
Në këtë kuptim, Grushko ka shfrytëzuar rastin për të dhënë një tjetër paralajmërim.
“Në rast se forcat dhe mjetet nga vendet e tjera të NATO-s vendosen në Finlandë, ne do të ndërmarrim hapa shtesë për të garantuar sigurinë ushtarake të Rusisë”.
Iniciativa për përfshirjen e Finlandës në NATO daton shumë kohë më parë. Aplikimi është përpunuar praktikisht që nga fillimi i mosmarrëveshjes midis Rusisë dhe Ukrainës. Gjatë gjithë procesit, ka pasur disa autoritete ruse që janë shprehur për këtë çështje. Ky është rasti i Presidentit Vladimir Putin, i cili theksoi se vendi i tij “nuk ka shqetësime apo pretendime territoriale” me këto vende.
“Nuk ka asgjë që mund të na shqetësojë për anëtarësimin e Finlandës dhe Suedisë në NATO. Nëse kjo është ajo që ata duan, atëherë vazhdoni”, shtoi presidenti rus, i cili megjithatë nuk përjashtoi “tensione të caktuara” nëse këto vende “gjenerojnë kërcënime”.
