Krimi është kthyer në një problem shqetësues në vendin tonë.
Pothuajse çdo ditë opinioni publik tronditet nga vrasjet e njerëzve të botës së krimit por edhe qytetarë të pafajshëm aksidentalisht bëhen viktimë e plumbave që bandat hakmerren ndaj njëra tjetrës.
Siguria në Shqipëri është në nivelin më të ulët pasi bandat kriminale shpesh herë “palë” me policinë, arrijnë që të kryejnë vrasje të pa shqetësuar dhe më pas zhduken pa lënë gjurmë.
Drejtori i Policisë së Shtetit, Muhamet Rrumbullaku ka shkuar paraditen e kësaj të hëne në ambientet e Drejtorisë Vendore të Tiranës. Rumbullaku është duke zhvilluar një takim me drejtuesin Tonin Vocaj, për t’i kërkuar “llogari” pasi asnjë prej ngjarjeve të rënda kriminale nuk është zbardhur, aq më pak të arrestohen autorët e krimeve.
Në fokus të bisedës mendohet të jetë dhe sulmi me armë ndaj televizionit kombëtar Top Channel, ku mbeti i vrarë roja i sigurisë Pal Kola dhe u mbushën me plumba vetratat e xhamit.
Një tjetër ngjarje e rëndë është dhe ajo e atentatit në Don Bosko, ku nga breshëria e plumbave ndaj lokalit në pronësi të Fation Muratit, mbeti e vrarë banakierja dhe u plagosën rreth pesë persona të tjerë që ndodheshin aty.
Po ashtu, mes Rrumbullakut dhe Vocajt do të diskutohet dhe për strukturën e re të Policisë së Shtetit, e cila parashikon krijimin e departamenteve të reja për luftën kundër krimeve ndaj jetës, krimit ekonomik dhe të tjera.
Tashmë qytetarët çdo ditë terrorizohen nga krismat e kallashnikovit që janë bërë pjesë e pandashme e përditshmërisë sonë.
