Sot në Gjykatën e Hagës do të nis procesi gjyqësor ndaj ish-udhëheqësve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi.
Ish-krerët e UÇK-së po akuzohen për krime lufte dhe krime kundër njerëzimit, gjatë luftës në Kosovë në vitet 1998/99 dhe ndodhen në qendrën e paraburgimit në Hagë prej nëntorit të vitit 2020.
Në paraqitjet e tyre para gjykatësit të procedurës paraprake ata janë deklaruar të pafajshëm.
Aktakuza ndaj tyre ishte konfirmuar në nëntor të vitit 2020 për t’u ndryshuar pastaj më 3 shtator 2021, 29 prill dhe 30 shtator 2022.Ndërsa versioni i aktakuzës me më pak redaktime, e cila është në fuqi aktualisht, u dorëzua në shkurt të këtij viti.
Gjatë ditës së sotme, Zyra e Prokurorit të Specializuar do të paraqesë deklaratën hyrëse që mund të zgjasë deri në 5 orë.
Ndërkohë, pas “Marshit për Drejtësi” që u zhvillua ditën e djeshme në Prishtinë, ku afro 100 mijë qytetarë, por edhe aktivistë e politikanë të të gjitha krahëve iu bashkuan thirrjes për drejtësi për ish-krerët e UÇK-së, një i ngjashëm do të zhvillohet sot në Hagë.
Dhjetëra autobusë me shqiptarë të diasporës kanë shkuar në Hagë, ku janë mbledhur për të tubuar, me flamuj të kuq dhe plisa në kokë.
Autobusët me përfaqësues të diasporës, kryesisht nga Gjermania, Austria, Zvicra e Belgjika janë nisur prej orëve të paratë mëngjesit për në Hagë dhe do t’i bashkohen protestës që pritet të nisë në orën 10:00.
Milaim Gashi është një prej shqiptarëve që me flamurin kuqezi në dorë është stacionuar ndër të parët, para godinës së Gjykatës.
Ai ka ardhur nga Freiburgu i Gjermanisë për të mbështetur ish-krerët e UÇK-së, duke thënë se ndaj tyre po bëhet padrejtësi dhe ata meritojnë mbështetje.
“Ne jemi këtu me shpall pakënaqësi ndaj gjykatës se Hagës, është një padrejtësi e madhe që po u bëhet krerëve të Ushtrisë Çlirimtare të Kosovës”, thotë ai.
“Do të solidarizohemi deri në fund”, shtoi ai.
