Bajram Begaj i është “bindur” kryeministrit Edi Rama lidhur me propozimin për kreun e ri të SHISH.
Presidenti i Republikës Bajram Begaj dekretoi sot emërimin e Vlora Hyseni si drejtuese e Shërbimit Informativ të Shtetit.
Kujtojmë se propozimi i emrit të saj nga ana e kryeministrit Edi Rama shkaktoi një valë reagimesh, lidhur me postim që ajo mbante më parë si drejtuese e Shërbimit Informativ të Kosovës.
Kush është Vlora Hyseni dhe dyshimet për lidhjet e saj me Serbinë
Vlora Hyseni ka qenë nënkryetare e shërbimit të inteligjencës në Kosovë (AKI). Ajo u shkarkua nga posti nga presidentja Vjosa Osmani dhe kryeministri Albin Kurti. Zyrtarisht nuk u dha arsyeja, por pati spekulime në media për lidhje të Hysenit me serbët.
“Vendimi për shkarkim e obligon znj. Vlora Hyseni të bëjë dorëzimin e të gjitha mjeteve dhe materialeve me të cilat ka qenë e ngarkuar. Gjithashtu, znj. Vlora Hyseni, sipas vendimit, obligohet që të ruajë të gjitha informacionet që ka marrë gjatë ushtrimit të detyrës, pavarësisht sesi i është dhënë qasja në to apo si i ka pranuar ato, apo në çfarëdo forme tjetër ka arritur të posedoj informacione të klasifikuara”, thuhej në njoftimin zyrtar.
Ajo mbulonte marrëdhëniet e Kosovës me Serbinë në AKI dhe njihet si njeri i Hashim Thaçit. Pas shkarkimit, Edi Rama e mori si këshilltare. Tanimë, me propozimin e tij dhe miratimin e kreut të shtetit Begaj, ajo është drejtuesja e re e SHISH.
