Një sasi kanabisi raportohet se është kapur këtë të dielë në pikën e kalimit kufitar të Kapshticës, në kufirin shqiptaro-grek.
Mesohet se një mjet tip “Rulot” që drejtohej nga një çift rumunësh po udhëtonte drejt Greqisë kur autoritetet kanë identifikuar lëndën narkotike.
Mësohet se autoritetet kanë arrestuar drejtuesin e mjetit me origjinë rumune dhe partneren e tij.
Droga në mjet është zbuluar pasi “Ruloti” i është nënshtruar kontrollit në skaner. Forcat e rendit kanë konstatuar diçka të dyshimtë, çka e detyruan policinë kufitare të ushtrojë kontroll më të imtësishëm në mjet.
Ndërkohë, dy të arrestuarit po shoqërohen në mjediset e drejtorisë vendore të policisë së Korçës, aty ku do të merren në pyetje për të zbuluar edhe destinacionin e lëndës narkotike.
Njoftimi policisë:
Kapshticë/ Si rezultat i një operacioni të mirëkoordinuar nga shërbimet e Stacionit të Policisë Kufitare Kapshticë, në bashkëpunim me specialistët e Seksionit për Hetimin e Narkotikëve dhe Trafiqeve të Paligjshme të DVP Korçë, është goditur 1 tjetër tentativë e trafikimit të lëndëve narkotike në drejtim të shtetit grek.
Në kuadër të këtij operacioni, në dalje të Republikës së Shqipërisë, është ndaluar e shoqëruar një shtetas rumun dhe është sekuestruar një sasi e lëndës narkotike kanabis.
Nga ana e Policisë po vijon puna për dokumentimin e plotë të këtij rasti dhe në përfundim të veprimeve procedurale, peshimit të sasisë të lëndës narkotike, do ju informojmë me një informacion më të detajuar.
