Shqipëria u anëtarësua zyrtarisht në NATO më 1 prill 2009 dhe sot bëhen plot 14 vite nga ajo ditë e shënuar. Me këtë rast ka reaguar edhe ambasada amerikane në Tiranë.
Në një postim në rrjetet sociale, ambasada vlerëson kontributin e dhënë nga Shqipëria gjatë këtyre viteve në alenacë. “Shqipëria ka treguar përkushtimin e saj për të promovuar paqen dhe sigurinë dhe ka luajtur një rol jetik në mbështetjen e misioneve dhe operacioneve të drejtuara nga NATO. Si një aleat dhe partner krenar, Shtetet e Bashkuara vlerësojnë partneritetin tonë të fortë me Shqipërinë dhe mezi pret të vazhdojë të punojë së bashku drejt synimeve tona të përbashkëta për një të ardhme më të sigurt dhe më të begatë”, thuhet në njoftim.
Ndërkohë, ka reaguar edhe presidenti Bajram Begaj. Ai shkruan në rrjetet sociale se Shqipëria është krenare që kontribuon për paqen dhe sigurinë. “14 vjet Shqipëria në NATO! Krenarë që jemi pjesë e aleancës më të fuqishme dhe më të suksesshme në botë! Krenarë që jemi kontribuues për paqen dhe sigurinë”, shkruan Begaj.
Shqipëria mori për herë të parë pjesë si anëtare me të drejta të plota e Organizatës së Traktatit të Atlantikut Verior në samitin që u mbajt në Strasbourg/Kehl më 4 prill 2009, ndërkohë që më 7 prill 2009, në selinë e Aleancës në Bruksel, u zhvillua ceremonia zyrtare e ngritjes së flamujve të Shqipërisë dhe Kroacisë në NATO.
