Një armë zjarri dhe një shumë monetare prej 39 mijë eurosh janë gjetur nga policia gjatë një kontrolli në një banesë në Vlorë.
Banesa në fjalë, sipas policisë, është e Rodrigo Shemshos, pjesë e një grupi kriminal.
33-vjeçari, i cili rezulton të jetë arrestuar dy vite më parë, është shpallur në kërkim policor pas bastisjes. Ai akuzohet veprat penale “Mbajtja pa leje dhe prodhimi i armëve, armëve shpërthyese dhe municionit”, “Pastrimi i produkteve të veprës penale ose veprimtarisë kriminale” dhe “Fshehja e të ardhurave”.
Kontrollet
Sipas bluve të Vlorës, kontrolli në këtë banesë nga drejtoria e policisë lokale dhe FNSH vjen në kuadër të një plani për “parandalimin e ngjarjeve kriminale, si dhe për kapjen e shtetasve me rekorde penale në kuadër të grupeve kriminale”.
Të njëjtat burime bënë me dije se ka pasur kontrolle të tjera në disa ambiente, kryesisht banesa, që dyshohet se përdoren nga pjesëtarë të grupeve kriminale, ndërsa shtojnë se ato do të vijojnë në të gjithë qarkun.
Në banesën e 33-vjeçarit në lagjen “Pavarësia” u gjetën dhe sekuestruan në cilësinë e provës materiale 1 armë zjarri pistoletë me fishek në fole, municion luftarak dhe shuma 39 000 euro, të dyshuara të përfituara nga veprimtaria e grupit kriminal, ku sipas bluve, bënte pjesë Shemsho.
Arrestimi për tentativë vrasje
Rodrigo Shemsho alias Juxhin Orhan u arrestua në Korrik 2021 po në qytetin bregdetar, në një aksion ku morën pjesë dhe forcat “Shqiponja”.
Sipas njoftimit policor të kohës, ai ishte shpallur në kërkim për veprat penale “Vrasje me dashje e mbetur në tentativë” dhe “Prodhim e mbajtje pa leje e armëve, armëve shpërthyese dhe municionit”.
Akuzat lidhen me një ngjarje të ndodhur më 13 Dhjetor 2020. Asokohe, siç shpjegonte policia në njoftimin zyrtar, Shemsho dyshohet se ka tentuar të vrasi me armë zjarri një 38-vjeccar.
Para arrestimit të tij, në pranga lidhur me këtë episod ishte vënë dhe një 47 vjeçar me iniciale K.M. për moskallëzim krimi.
Mbetet e paqartë, të paktën për momentin, se si Shemsho u lirua pas ndalimit.
