Nga Klodian Tomorri
Kur ish drejtuesi i SPAK, Arben Kraja, duhet të justifikonte absurdin e mos bllokimit të inceneratorit të Tiranës edhe pse aty ishte provuar korrupsion, gjeti shpëtim tek deklarata e famshme që hetimet për këtë cështje janë komplekse. Zoti Kraja iku. Por sikleti i inceneratorit mbeti aty. Tani halli për të justifikuar të pajustifikueshmen i ka rënë pasardhësit të tij.
Një ditë më parë, kreu aktual i SPAK, Altin Dumani, i ra fyellit në të njëjtën vrimë. Vetëm se ky u tregua pak më kreativ dhe në vend të termit kompleks përdori një fjalë me shqip. “Hetimet për inceneratorin e Tiranës janë shumë të vështira, pasi nuk dihet kush janë pronarët reale”- tha zoti Dumani.
Ka një lojë të njohur për femijët, që quhet loja e kungulleshkës. Baza e lojës është thjesht teka e zgjedhjes së një numri kot dhe mbrotja e tij pa asnjë argument. Ndoshta zoti Kraja dhe zoti Dumani nuk kanë luajtur kur kanë qenë fëmijë. Por është e sigurtë që u ra halli të luajnë kungulleshkash në moshë madhore.
Justifikimi i kreut të SPAK, që ne nuk e bllokojmë dot inceneratorin pasi nuk gjejmë dot se kush janë pronarët reale është po aq absurd sa fakti që qeveria shqiptare paguan para për një kontratë korruptive, të cilat shkojnë në llogarinë e disa personave që policia e qeverisë kërkojnë t’i arrestojë.
Ka një mënyrë shumë efektive për të gjetur se kush janë pronarët e vërtetë të inceneratorit të Tiranës. Kjo është bllokimi i pagesave. Kur mbyllet rubineti i parave, hajdutët e nxjerrin vetë kokën nga shkurret e offshoreve ku fshihen. Zoti Dumani dhe të gjithë prokurorët e SPAK këtë e dinë shumë mirë. Dhe do ishin shumë më serioze dhe të besueshëm nëse do thonin, që ne e dimë kush janë pronarët, ndaj nuk e bllokojmë dot. Por sic e thashë, këtyre u ra halli të luajnë kungulleshkash në moshë madhore. Ndërsa shqiptarëve, u ka rënë halli të paguajnë.
Të gjitha justifikimet për mos sekuestrimin e inceneratorëve janë manipulim intelektual. E vetmja rezervë këtu është përdorimi i termit intelektual se në fakt, justifikimet janë realisht banale.
Qeveria për shembull na thotë, që nuk mund t‘i bllokojme dot pagesat se na mbytet Tirana me plehra. Mjere Tirana c’paska hequr përpara se të gjendeshin 3 shpëtimtarët, Mërtiri, Zoto dhe Gugalla. Sigurisht që këta do ishin shumë më seriozë po të thonin, që nuk e sekuestrojmë dot dhe Tiranën se kemi hall mos mbingarkojmë Farudin Arapin me shumë punë. Por nejse, qeveria është në konflikt interesi këtu.
Ajo që nuk duhet të ishte në konflikt interesi, është prokuroria. Por këta ose kanë frikë ta hapin purset e qelbur të Inceneratorit të Tiranës, ose kanë rënë dhe vet brenda në të. Njësoj si tek ai skeci brilant me të ndjerin Koco Devole: ne presim shpëtim nga segmentet, por segmentet na paskan rënë vetë brenda. Ndaj shqiptarëve u mbetet vetëm të paguajnë paratë me vetëdijen e plotë se ato po vidhen. Dhe te shijojnë kungulleshkat që luan SPAK-u.
