Kandidati i Enkelejd Alibeajt për bashkinë e Tiranës në zgjedhjet lokale të 14 majit, Roland Bejko ka rrëfyer në një studio televizive se ka pranuar të hyjë në garë, vetëm që vula e Partisë Demokratike të mos i kalonte Sali Berishës.
Bejko tha se nuk ka ndërmend të tërhiqet nga gara për drejtimin e Bashkisë së Tiranës, edhe pse më 14 maj do të përballet me kolegun e tij demokrat, Belind Këlliçi.
Sipas tij, nëse do të zgjidhte të mos garonte në kryeqytet, Alibeaj do të jepte dorëheqjen nga kryesimi i komanduar i PD-së dhe vula do t’i kalonte ish-kryeministrit.
“Nëse unë nuk do garoja, Alibeaj do jepte dorëheqjen dhe vula do i shkonte Sali Berishës”, tha Bejko.
Ai ka zbuluar edhe prapaskenat nga mbledhjet e grupit Alibeaj, ku fraksioni u përça në tre dy-minigrupime.
Në një grup bënin pjesë deputetët Gazment Bardhi, Jorida Tabaku, Dhurata Çupi e Bledian Nallbati që kërkonin të garonin në 14 maj vetëm për këshillat bashkiakë dhe grupi tjetër i Enkelejd Alibeajt synonte të garonte në 61 bashkitë.
Bejko tha se ai i ka propozuar Tabakut dhe Bardhit, që të kishin një “primare” me njëri-tjetrin dhe kush dilte i fituar të ishte kandidat i PD-së zyrtare për kryeqytetin në 14 maj, duke sakrifikuar kështu mandatin e deputetit.
“Unë i kërkova që një nga drejtuesit e lartë, Tabaku apo Bardhi të bënin një sakrificë dhe të futeshin në garë për bashkinë e Tiranës, fakti që dorëhiqesh tregon që e ke seriozisht kauzën dhe ngroh entuiziazmin. Ata nuk pranuan, preferuan që të mbajnë detyrat e tyre dhe patën qëndrime krejt ndryshe nga kryesia, njëri thonte kandidat për bashki në zona të pjesshme, ku mendohet se do fitonim, nga ana tjetër ishte Tabaku dhe disa deputet të tjerë që të futemi vetëm me Këshillat”, zbuloi Bejko.
Më tej kandidati i Alibeajt deliroi duke e krahasuar veten me kryeministrin britanik Rishi Sunak, në sensin që ka thyer të gjitha tabutë dhe paragjykimet, pasi është i lindur në Lazarat dhe po kandidon për bashkinë më të madhe në vend.
“Unë kam 18 vjet në Tiranë, banoj këtu dhe jam pedagog këtu, kam qenë drejtues i lartë në Ministri të Brendshme, themelues i shkollës ASPA, drejtor i pushteti vendor dhe i integrimit, pastaj shkova nga Ministria e Jashtme, pedagog. Dhashë dorëheqjen se ishte një kaos total. Britania e Madhe e ka kryeministrin jo anglez, SHBA vendosi një president me ngjyrë, në Skoci po ashtu dhe ta kesh këtë mentalitet tregon se je shumë i vjetër, Tirana është kosmopolite dhe të drejtën e ka kushdo. Do kullosja lopët në Lazarat? Unë mbarova shkollën për të dhënë kontribut këtu”, deklaroi Bejko.
