Një nxënës shkolle është plagosur me thikë këtë të Enjte në periferi të kryeqytetit.
Ngjarja ka ndodhur në Paskuqan në shkollën 9-vjeçare “Jashar Hoxha”. Sipas policisë, janë konfliktuar dy nxënës shkolle dhe gjatë konfliktit, një 15-vjeçar, dyshohet se ka goditur me mjet prerës një bashkëmoshatarin e tij, i cili si pasojë është dëmtuar dhe ndodhet nën kujdesin e mjekëve.
Autori i dyshuar është shoqëruar në komisariat për veprime të mëtejshme, ndërsa grupi hetimor po punon për sqarimin e rrethanave të ngjarjes, shtuan të njëjtat burime.
Vrasje dhe plagosje
Më herët gjatë ditës, një plagosje e dyfishtë u shënua në një familje në Tepelenë, ku kryefamiljari goditi të shoqen e më pas veten. Të dy u transportuan në spital në gjendje të rëndë.
Një tjetër plagosje u shënua në kryeqytet gjatë mbrëmjes së djeshme te zona e njohur si “Komuna e Parisit”, ku një 19-vjeçar u plagos me thikë. Autori u arrestua pas ngjarjes, ndërsa policia njoftoi se konflikti mes palëve ndodhi për “motive të dobëta”.
Ngjarja i pasoi një krimi me dy të vrarë në Kavajë. Altin Rexha alias Sali Rexha dhe Edmond Gosa alias Armand Gosa gjatë një konflikti mes tyre u qëlluan me thikë dhe armë zjarri. Të dy humbën jetën në spital, ndërsa e gjithë skena ndodhi në sytë e vajzës së mitur së një prej viktimave. Dyshimet janë se konflikti mes palëve që çoi në vrasjen e dyfishtë janë se lindi për arsye banale.
Ndërkohë, në orët e para të kësaj jave, një breshëri plumbash e derdhur mbi godinën e televizionit Top Channel solli vrasjen e rojës që punonte aty, Pal Kola. Autorët janë ende të paidentifikuar nga autoritetet.
