Ka nisur me tensione protesta e Bërxullës ku banorët e zonës kërkojnë prej muajsh shpronësimin e drejtë sipas tyre të pronave që preken nga projekti i aksit Thumanë-Kashar.
Këtë herë aksioni i tyre ka nisur duke bllokuar menjëherë rrugën. Kaq ka mjaftuar që të krijohet përplasja mes protestuesve dhe efektivëve të policisë të cilët kanë rrethuar zonën duke kërkuar që të lirohet rruga.
Një nga banoret e moshuara thotë se prej 6 muajsh ata protestojnë dhe asnjë nga pushtetarët nuk ka shkuar ti takojë.
E moshuara: Shteti nuk pyet për banorët, i jemi drejtuar çdo insiticuinoni s’na kanë gjetur zgjidhje, bëjnë sehir.
Jemi autoktonë, tokat i kemi të trashëguara, i kemi certifikatat e t’gjitha, jemi të rregullt, dhe shteti s’vjen të flasë me ne. 6 muaj asnjë njeri s’ka ardhur të na japë një pergjigje. për ça punon ky shtet? Ka shkelje”…
Banorët e Bërxullës kundërshtojnë projektin e zgjerimit të aksit rrugor ‘Thumanë-Kashar’ i cili prek banesat e tyre. Kjo nuk është protesta e parë që ndodh nga banorët e kësaj zonë lidhur me këtë shqetësim, pasi mësohet se ata nuk janë dakord me skemën e shpronësimit të pronave të tyre që preken nga projekti i rrugës. Sipas tyre çmimi i tregut për pronat e tyre është rreth 50 euro për metër katror, ndërsa atyre u është ofruar një kompensim me rreth 4 euro për metër katror, gjë që ata e kanë refuzuar kategorikisht.
