E ardhmja e Lionel Messi në Francë me PSG u vendos në dyshim duke qenë se kontrata e sulmuesit me kryeqytetasit mbyllet në fundin e sezonit aktual. Aludimet për një rikthim te Barcelona janë të shumta, apo edhe për një transferim të argjentinasit në Amerikë ose në Arabinë Saudite. Mirëpo, duket se dyshimet në kokën e Messit janë të pakta.
Plani i “pleshtit” është të rinovojë me PSG të paktën edhe për një sezon e më pas të largohet drejt Amerikës aty ku ka kërkesa të shumta nga klubet e MLS. Duke u aktivizuar në MLS, numri 10 fiton kohën e nevojshme për t’u përshtatur në një territor të ri pasi një tjetër objektiv është Botërori i vitit 2026 që është përcaktuar të zhvillohet në Amerikë, Kanada dhe Meksikë.
Messi kërkon të luajë me Argjentinën si një Kampion Bote në eventin më të rëndësishëm futbollistik, pse jo për të synuar një tjetër titull edhe pse në vitin 2026 do të ishte në moshën 39-vjeçare. Megjithatë, trajneri i albicelestëve, Lionel Scaloni si dhe shokët e kombëtares besojnë te “pleshti” dhe janë të bindur se mund t’i dhurojnë fundin më të ëmbël të një karrierë që gjithsesi do të jetë e paharrueshme.
