Ngjarja e rëndë që ndodhi gjatë mesnatës në ambientet e Top Channel, ku mbeti i vrarë roja i sigurisë Pal Kola, vijon të jetë në sitën e hetimeve, ndërsa pamje të reja janë publikuar lidhur me rastin.
Në videon e mëposhtme, shihet zona e rrethuar nga forca të shumta policie, autoambulanca që futet dhe momenti kur merr trupin e pajetë të punonjësit që mbeti i vrarë.
Ngjarja ndodhi rreth orës 01:00, ku persona ende të paidentifikuar, u afruan me një automjet tip ‘Range Rover’ ma targa të vjedhura dhe hapën zjarr në drejtim të Top Channel. Në vendin e ngjarjes janë sekuestruar të paktën 25 gëzhoja kallashnikovi, ndërsa një nga plumbat ka përfunduar në trupin e punonjësit, duke i marrë jetën.
Pas ngjarjes, autorët janë larguar, ndërsa në aksin Tiranë-Durrës është gjetur automjeti që kanë përdorur në krim bashkë me dy armë tip kallashnikovi.
Nuk dihen ende shkaqet e ngjarjes së rëndë, ndërsa rasti po hetohet nga policia.
